आळंदी, ता. ३० : आळंदी नगरपरिषदेअंतर्गत पंतप्रधान सूक्ष्म अन्न प्रक्रिया उद्योग योजनेअंतर्गत स्वयंसहाय्यता महिला बचत गटांना एकूण २० लाख ९० हजार रुपये इतक्या विना तारण बीज भांडवलाचे वाटप बुधवारी (ता. ३०) करण्यात आले.
आळंदी नगरपरिषद कार्यालयात हा कार्यक्रम पार पडला. नगरपरिषदेच्या वतीने बचत गटांना कर्ज वाटप करण्यात आले. यावेळी सुवर्णा काळे, अर्चना भिसे, अर्जुन घोडे, सोनाली रत्नपारखी, तसेच नगरपरिषदेचे अधिकारी कर्मचारी वर्ग उपस्थित होते. यावेळी कार्यक्रमाचे प्रमुख मार्गदर्शक म्हणून आळंदी नगरपरिषदेचे मुख्याधिकारी माधव खांडेकर यांनी महिलांना व्यवसायविषयक मार्गदर्शन केले.
यावेळी मार्गदर्शन करताना मुख्याधिकारी खांडेकर म्हणाले ‘‘बीज भांडवल म्हणजे केवळ कर्ज नव्हे, तर महिलांच्या आत्मविश्वासाची आणि स्वप्नपूर्तीची पहिली पायरी आहे. कार्यक्रमाच्या माध्यमातून महिला बचत गटांना उद्योजकतेसाठी आर्थिक पाठबळ मिळाले असून, स्वावलंबनाच्या दिशेने त्यांची भक्कम वाटचाल सुरू झाली आहे.’’
दरम्यान, या कार्यक्रमात विविध यशस्वी बचत गटांच्या पाच महिलांनी मनोगत व्यक्त करत आपल्या व्यवसायातील अनुभव सांगितले. कर्जामुळे व्यवसायात मिळालेल्या यशाबद्दल त्यांनी कृतज्ञता व्यक्त केली. वैशाली पाटील यांनी सूत्रसंचालन केले.

कर्ज वाटप केलेले बचतगट खालीलप्रमाणे
जागृती महिला बचत गट- तीन लाख २० हजार
सरस्वती महिला बचत गट- तीन लाख ६० हजार
अलंकापुरी महिला बचत गट- लाख ६५ हजार
संघर्ष महिला बचत गट- तीन लाख ६५ हजार
तेजस्विनी महिला बचत गट- ३ लाख २० हजार
इंदिरा महिला बचत गट- ३ लाख ६० हजार