आळंदी, ता. ८ : ‘चला शिकूया कला’, ‘देऊया संस्कारांची जोड, निसर्गाचे अनुकरण ठेवते निसर्ग गोड’ या संकल्पनेतून
आळंदी नगरपरिषद मार्फत पर्यावरण पूरक गणेशोत्सव साजरा करण्याच्या उद्देशाने शाडू मातीपासून गणेशमूर्ती बनविण्याची कार्यशाळा शुक्रवारी (ता. ८) घेण्यात आल्याची माहिती मुख्याधिकारी माधव खांडेकर आणि आरोग्य विभाग प्रमुख श्रद्धा गर्जे यांनी दिली.
ही कार्यशाळा माझी वसुंधरा अभियान आणि स्वच्छ सर्वेक्षण २०२५ च्या अनुषंगाने प्रदूषणमुक्त आणि शाश्‍वत उत्सव साजरा करण्याच्या हेतूने राबविण्यात येत आहे. खांडेकर म्हणाले, ‘‘कार्यशाळेत सहभागी होणाऱ्या नागरिकांना पर्यावरणपूरक शाडू मातीचा वापर, पारंपरिक मूर्ती बनवण्याचे तंत्र आणि जलप्रदूषण टाळण्याचे महत्त्व यावर प्रत्यक्ष प्रशिक्षण दिले जाईल. ही कार्यशाळा आळंदीचे नागरिक तसेच विद्यार्थ्यांसाठी असणार आहे. प्लास्टर ऑफ पॅरिस तसेच थर्माकोलचा वापर गणेशोत्सव काळात टाळण्यासाठी तसेच यामुळे होणारे प्रदूषण आणि त्याचे दुष्परिणाम याबाबत सखोल माहिती कार्यशाळेत दिली जाणार आहे. इंद्रायणी नदी ही राज्यातील तीर्थक्षेत्रातील महत्त्वाचा भाग असून वारकऱ्यांच्या तीर्थस्नानासाठी जलप्रदूषण टाळणे यासाठी सर्व नागरिकांनी प्रशासनाने आपापली जबाबदारी पार पाडणे महत्त्वाचे आहे. गणेशोत्सव काळात इंद्रायणी नदीत प्रदूषण टाळण्यासाठी नागरिकांनी प्रशासनामार्फत दिलेल्या सूचनांचे काटेकोर पालन करावे. शाडू मूर्ती पासून बनवण्यात आलेल्या गणेश मूर्ती पर्यावरणास कशा पूरक राहतात याबाबत माहिती दिली जाणार आहे. शाडूची मूर्ती बनविण्याच्या पद्धती कार्यशाळेत शिकवल्या जाणार आहेत.