आळंदी, ता. ८ : देहू फाटा येथे राग अनावर न झाल्याने एकाने वाहतूक पोलिसाला दगड मारला. कल्याण अद्रक भोसले असे जखमी पोलिसाचे नाव आहे. ही घटना गुरुवारी (ता. ७) सायंकाळी सव्वा सहाच्या सुमारास घडली. याप्रकरणी इस्माईल सैफल भागानगरे (रा. मोहन नगर खडीमशीन रोड भोसरी) याच्यावर गुन्हा दाखल झाला आहे.
पोलिसांनी दिलेल्या माहितीनुसार, आरोपी भागानगरे आळंदीहून दिघीच्या दिशेने जात होता. भोसले यांनी देहू फाटा येथे वाहन परवाना तसेच कागदपत्रे तपासणीसाठी त्याची गाडी थांबविली. गाडीचे छायाचित्र काढत असताना त्याने भोसले यांना शिवीगाळ केली. त्यानंतर त्याने भोसले यांच्या दिशेने दगड मारला. तो दगड भोसले यांच्या डोक्यात लागल्याने त्यांच्या डोक्यातून रक्तस्राव होऊ लागला. तसेच त्यांच्या उजव्या हाताला देखील जखम झाली. यावेळी आजूबाजूचे इतर सहकारी पोलिस तसेच नागरिकांनी भागानगरे यास ताब्यात घेतले. भोसले यांना वडमुखवाडी येथील खासगी रुग्णालयात उपचारासाठी दाखल केले. याप्रकरणी दिघी पोलिस अधिक तपास करत आहेत.