पारगाव, ता. २२ : मे महिन्यात मॉन्सूनपूर्व जोरदार अवकाळी पाऊस झाल्याने त्याचा फटका शेतातील सर्वच पिकांना बसला. शेतात पाणी साचून राहिल्याने तरकारी पिके सडून गेली त्यामुळे उत्पादनात मोठी घट झाली. यामुळे आवक कमी झाल्याने गवारीला चांगला बाजारभाव मिळत आहे. प्रति १० किलोला ८०० ते ९०० रुपये असा उच्चांकी बाजारभाव मिळत असल्याने आंबेगाव तालुक्यातील गवार उत्पादक शेतकऱ्यांमध्ये उत्साहाचे वातावरण आहे.

आंबेगाव तालुक्यातील पोंदेवाडी, लाखणगाव, देवगाव, जारकरवाडी, बढेकरवस्ती, धामणी, खडकवाडी, वाळुंजनगर, रानमळा, लोणी व मांदळेवाडी या परिसरात दरवर्षी सुमारे ३५० ते ४०० एकर क्षेत्रावर गवारीची लागवड होत आहे. एकरी सरासरी एक ते सव्वा लाख रुपयांचे निव्वळ उत्पन्न मिळत आहे.
घोडनदी लगत असलेली काठापूर बुद्रुक, देवगाव, लाखणगाव तसेच डिंभे कालव्यालगत असलेली पोंदेवाडी, खडकवाडी, बढेकरवस्ती या गावांचा अपवाद वगळता इतर गावातील शेती ही प्रामुख्याने पावसाच्या पाण्यावर अवलंबून आहे.
वाळुंजनगर (ता. आंबेगाव ) येथील जयेश तान्हाजी वाळुंज यांनी अडीच एकर क्षेत्रात गवारीचे पीक घेतले आहे. पेरणी पद्धतीने गवार लावल्याने त्यांना नऊ किलो बी लागले. पेरणी नंतर एक महिन्याने रासायनिक खताचा डोस दिला. पेरणी नंतर ४५ दिवसाने पहिला तोडा झाला वाळुंज यांची जमीन उताराची असल्याने शेतात पावसाचे पाणी साचून राहिले नाही. यावर्षी पावसाचे प्रमाण जास्त असल्याने अनेक शेतकऱ्यांच्या शेतातील गवारीच्या पिकाला फटका बसला परंतु जयेश वाळुंज हे कृषी पदवीधर असल्याने त्यांनी मावा, तुडतुडे, लालकोळी, भुरी या बुरशीजन्य रोगाचा प्रादुर्भाव होऊ नये म्हणून वेळेवर औषधांचीची फवारणी केली.

पावणेदोन लाख रुपयांचा निव्वळ नफा
पाऊस सतत पडत असल्याने कमी वेळेत फवारणी करता यावी म्हणून ड्रोनच्या साह्याने फवारणी केली. त्यांना पहिल्या तोड्याला ५०० किलो, दुसऱ्या तोड्याला ८०० तर तिसऱ्या तोड्याला ११०० किलो गवार निघाली त्यांच्या गवारीला ८०० ते ९२० रुपये प्रती १० किलोला दर मिळाला या प्रमाणे सरासरी ८०० रुपये बाजारभाव मिळाला. त्यांना गवारीसाठी एकूण २५ हजार उत्पादन खर्च आला पहिल्या तीन तोड्यात एकूण दोन लाख रुपयांचे उत्पन्न मिळाले असून उत्पादन खर्च वजा जाता पावणेदोन लाख रुपयांचा निव्वळ नफा झाला आहे, असे विश्वास जयेश वाळुंज यांनी व्यक्त केला

05746