भुकूम, ता. ७ ः खारावडे (ता. मुळशी) येथील रस्त्याची खड्ड्यांमुळे दुरवस्था झाली आहे. यामुळे भाविक, पर्यटक व ग्रामस्थ त्रस्त झाले आहेत. या रस्त्याची दुरुस्ती करावी अशी मागणी म्हस्वेश्वर देवस्थान व ग्रामस्थ यांनी केली असल्याचे अध्यक्षा मधुरा भेलके व सरपंच लक्ष्मण मारणे यांनी सांगितले.
येथील म्हस्वेश्वर देवाच्या दर्शनासाठी रविवार, मंगळवार, अमावस्या, पौर्णिमेला भाविकांची गर्दी असते. मुठा खोऱ्यातील निसर्ग सौंदर्य, टेमघर धरण, मुठा नदी परिसराचा आनंद घेण्यासाठी पर्यटकांची नेहमी गर्दी असते. तसेच, लवासा येथे पर्यटकांची गर्दी कायम आहे. खारावडे हे मध्यवर्ती गाव आहे. मुख्य रस्त्यापासून मंदिराकडे जाणाऱ्या रस्त्याच्या चौकात मोठे खड्डे पडले आहेत. येथे प्राथमिक शाळा, हॉटेल्स, ग्रामपंचायत व विकास सोसायटी कार्यालये, बस स्थानक आहे. त्यामुळे याठिकाणी सतत वर्दळ असते.
पीएमपील बस, एसटी, पर्यटकांच्या मोठ्या बस व चारचाकी गाड्यांच्या वाहतुकीमुळे खड्ड्यांचे प्रमाण वाढत आहे. हा रस्ता लवासा कंपनीने केला होता. काही वर्षापूर्वी कंपनीने जिल्हा परिषदेच्या बांधकाम विभागाकडे हस्तांतरित केला. तसेच, भोडे वातुंडे फाटा, खडकवाडी, लव्हार्डे, वळणा वळणावर रस्त्यावर खड्डे पडले आहेत. दरम्यान, येथील प्रवाशांची व गाड्यांची मोठी वाहतूक लक्षात घेऊन दुरुस्ती करणे आवश्यक आहे.

02641