भोर, ता. २० : शहरातील जुनी बांधकामे असलेली ७१ घरे व इमारती या धोकादायक असल्याचे नगरपालिकेने जाहीर केले. संबंधित मालमत्ताधारकांनी या बांधकामाचा वापर करू नये आणि आगामी पावसाळ्यात अपघात होऊन जीवितहानी झाल्यास त्याची जबाबदारी ही मालमत्ताधारकावर राहणार असल्याची नोटीस देण्यात आली आहे, अशी माहिती मुख्याधिकारी हेमंत किरुळकर यांनी दिली. पावसाळ्याच्या दिवसात वादळी वारे आणि पावसाचे प्रमाण अधिक असते. त्यामुळे जुन्या इमारती किंवा त्याचा काही भाग कोसळला जातो. यासाठी दरवर्षी पावसाळ्यापूर्वी नगरपालिकेच्या वतीने शहरातील जुन्या व धोकादायक इमारती व बांधकामांची तपासणी केली जाते. जी बांधकामे कालबाह्य झाली आहेत किंवा मोडकळीस आलेली आहेत, त्या मिळकतधारकांना नोटीस देवून संबंधित बांधकाम किंवा त्याचा भाग खाली करावा, असा आदेश दिला आहे. शहरात एकूण ७१ बांधकामे धोकादायक ठरली आहेत.
दरम्यान, शहरातील जुन्या व धोकादायक इमारतींच्या सभोवताली वाढलेल्या अतिक्रमणामुळे त्या रिकाम्या (खाली) करण्यासाठी जागाच शिल्लक नाही. यासाठी सर्वप्रथम आमच्या इमारतीशेजारील अनधिकृतपणे उभारलेल्या टपऱ्या काढाव्यात व अतिक्रमणे हटवावीत. त्यानंतर आम्ही आमच्या इमारतीचा धोकादायक भाग उतरवला जाईल. अशा आशयाचे उत्तर काही मालमत्ताधारक दरवर्षी नगरपालिकेला देत आहेत. परंतु, याबाबत नगरपालिकेकडून कोणतीही कारवाई केली जात नाही.