भोर, ता. २४ः आंबवडे खोऱ्यातील वडतुंबी येथे पूर्वेकडील फलटण (जि.सातारा) तालुक्यातील मेंढपाळाचे कुटुंब आले. बुधवारी(ता.२१) ते कुटुंब वडतुंबी येथील शेतकऱ्यांच्या शेतात थांबले होते. गुरुवारी (ता.२२) रात्री अचानक मुसळधार पाऊस झाला. त्यामुळे रात्रीतच शेतातील मेंढ्या बांधावर आणि मोकळ्या जागेत थांबविल्या. परंतु त्यांनी राहण्यासाठी शेतात टाकलेल्या पाल मात्र पूर्णपणे पाण्यात बुडाले.
गेल्या चार-पाच दिवसांपासून तालुक्यात सुरू असलेल्या मुसळधार पावसामुळे तालुक्यात आलेल्या मेंढपाळांचे खूप हाल झाले. मेंढपाळाच्या कुटुंबातील सदस्यांनी पूर्ण रात्र पावसात पिठाचे डबे आणि इतर उंच साहित्यावर बसून काढली. लहान मुलगा तर गाईच्या पाठीवर झोपला. शुक्रवारी (ता.२३) सकाळी ग्रामस्थांनी त्यांना मदत करून निवारा करून दिला.

पूर्व महाराष्ट्रातून अनेक मेंढपाळ हे उन्हाळ्यात भोर तालुक्यासह कोकणात येतात. विंचवाचे बिऱ्हाड पाठीवर असल्यासारखे ते सर्व अत्यावश्यक साहित्यासह शेळ्या-मेंढ्या, कोंबडी, बकरे आणि घोडे घेऊन येतात. आणि पावसाळा सुरू झाल्यानंतर पुन्हा आपल्या गावी जातात.
उन्हाळ्यात भोर तालुक्यातील विविध गावांमधील शेतकऱ्यांच्या शेतात मेंढ्या(बकरी) मुक्कामास ठेवतात. मेंढ्यांच्या लेंड्यांमुळे शेतात शेणखत मिळते आणि धान्य चांगल्या प्रकारे येते. यामुळे भोर तालुक्यातील शेतकरी दरवर्षी मेंढपाळांना आपल्या शेतात राहण्यासाठी आणि मेंढ्यांना बसण्यासाठी बोलवतात. यासाठी संबंधित मेंढपाळांना पैशांचा मोबदला दिला जातो. याशिवाय झाडे तोडणे व इतर कामेही मेंढपाळ करून देतात.

05339