भोर, ता. ७ : म्हाळवडी (ता. भोर) येथील माजी सरपंच सर्जेराव बोडके यांच्या प्रथम स्मृतिदिनाच्या दिवशी गावातील तरुणांनी २०० फळझाडांची लागवड करून त्यांना श्रद्धांजली वाहिली. राजेश बोडके व परिवाराने हा उपक्रम हाती घेतला.
सोमवारी (ता. ७) म्हाळवडीचे माजी सरपंच सर्जेराव बोडके यांचा प्रथम स्मृतीदिन होता. त्यांचे पुतणे राजेश बोडके यांनी फळझाडांची लागवड करून स्मृतीदिन साजरा करण्याची कल्पना मांडली. त्यास बोडके यांच्या पत्नी कल्पना बोडके आणि मुली पूनम, सनम, निलम, कोमल व पायल यांनी सहमती दर्शवली. राजेश बोडके यांनी रत्नागिरीवरून २०० फळझाडांची रोपे आणली. यामध्ये आंबा, जांभूळ, चिकू, लिंबू व शेवगा आदींचा समावेश आहे.
गावातील ज्येष्ठ नागरिकांबरोबर, तरुण-तरुणी व महिलांनी या उपक्रमात सहभाग घेतला. गावातील सार्वजनिक ठिकाणी व सर्जेराव बोडके यांच्या शेतात या फळझाडांची लागवड केली. यावेळी गावातील अरविंद बोडके, गणपत गायकवाड आदींसह दलित वस्तीमधील नागरिक उपस्थित होते. लागवड केलेल्या फळझाडांनी उन्हाळ्यात पाणी देण्याचे नियोजनही केल्याचे राजेश बोडके यांनी सांगितले. आपल्या प्रियजनांच्या स्मृतींना फुलवायचे असेल, तर ‘झाडे लावा, झाडे जगवा’ हा संदेश देण्याचा छोटासा प्रयत्न म्हाळवडीच्या तरुणांनी केला आहे.