बारामती, ता. १८ : शहरातील मध्यवर्ती चौक असलेल्या तीन हत्ती चौकामध्ये नटराज नाट्य कला मंडळाच्या दारात बारामतीतील सर्वात उंच ३० मीटरचा ध्वजस्तंभ उभारण्यात येणार आहे. देशभक्तीची भावना अधिक जाज्वल्य व्हावी, नवीन पिढीलाही प्रेरणा मिळावी, या उद्देशाने बारामतीच्या मध्यवर्ती असलेल्या तीन हत्ती चौकात ध्वजस्तंभ बसविला जाणार आहे. रविवारी (ता. १८) उपमुख्यमंत्री अजित पवार यांनी या ठिकाणी भेट देत अधिकाऱ्यांना याबाबत सूचना केल्याची माहिती नटराज नाट्य कला मंडळाचे अध्यक्ष किरण गुजर यांनी दिली. या ठिकाणी सुशोभीकरण व कायमस्वरूपी लाइटची व्यवस्था व रोषणाई या बाबींवरही चर्चा झाली असून, त्या नुसार येत्या काही महिन्यात हे काम पूर्णत्वास नेण्याचा प्रयत्न आहे.