बारामती, ता. २३ : संततधार पावसाने बारामतीचे जनजीवन विस्कळित झाले आहे. गुरुवारी (ता. २२) रात्रीपासूनच बारामतीत पावसाची संततधार सुरु आहे.
शुक्रवारचा (ता. २३) दिवसच पावसाने उजाडला. सकाळपासून सुरु असलेली पावसाची संततधार कायम होती. ऐन मे महिन्यात बारामतीकरांना रेनकोट आणि छत्री बाहेर काढावी लागली. सकाळपासून पावसाचा जोर बघून अनेकांनी घरातच थांबणे पसंत केल्याने रस्त्यावर तुरळक वाहतूक होती.
अनेकांनी पावसामुळे चारचाकी वाहनातून प्रवास करणे पसंत केले. त्यामुळे बारामतीत चारचाकी मोटारींची वर्दळ अधिक होती. संततधार पावसाने सखल भाग जलमय झाला होता. शहरातील अनेक रस्त्यांवर अनेक ठिकाणी गुडघाभर पाणी साचून राहिलेले होते. काही ठिकाणी पाणी वाहून जाण्यासाठी प्रयत्न केले गेले. मात्र अनेक ठिकाणी पाणी साचून राहिलेले होते.
सकाळपासूनच पावसाची तीव्रता सातत्याने कमी जास्त होत होती. काही काळ पावसाच्या जोरदार सरी बारामतीत कोसळल्या. अनेकांना लॉन्सवरील लग्नाचा बेत रद्द करून बंदीस्त हॉलमध्ये लग्नाचे कार्यक्रम घ्यावे लागले.