बारामती, ता. १९ : येथील महाराष्ट्र राज्य मार्ग परिवहन मंडळाच्या बारामती आगारास पूर्णवेळ आगारव्यवस्थापक देण्यास टाळाटाळ केली जात असल्याचे चित्र आहे.
विद्यमान आगारप्रमुख या वैद्यकीय रजेवर आहेत. त्या सप्टेंबर २०२४ पासून रजेवर गेल्यानंतर त्यांच्या जागी पूर्णवेळ आगार व्यवस्थापक नेमणे गरजेचे असतानाही एमआयडीसी आगाराचे व्यवस्थापक रविराज घोगरे यांच्याकडेच बारामतीचा अतिरिक्त कार्यभार सोपविण्यात आला आहे.
वास्तविक, जिल्ह्यातील एका मोठ्या आगारापैकी बारामती आगार आहे. स्वारगेट, शिवाजीनगर खालोखाल बारामती आगाराची व्याप्ती मोठी आहे. बारामती व एमआयडीसी मिळून दोन्ही आगारात ३३२ चालक व १७२ वाहक कार्यरत आहेत. १००हून अधिक बसेसची संख्या या दोन्ही आगारांची आहे, यातही बारामती आगाराचा मोठा हिस्सा आहे.
उपमुख्यमंत्री अजित पवार यांनी ५० कोटी रुपये खर्चून बारामतीचे बसस्थानक अद्ययावत केले. असे असताना १० महिने बारामती आगाराला स्वतंत्र आगार व्यवस्थापक का दिला जात नाही? असा प्रश्न प्रवासी व नागरिक उपस्थित करीत आहे. एकाच अधिकाऱ्याला दोन आगारांचा कार्यभार सांभाळताना कसरत करावी लागते. उपमुख्यमंत्र्यांचा मतदारसंघ असतानाही अधिकारी दिला जात नसल्याने आश्चर्य व्यक्त होत आहे.
बारामती आगाराला इलेक्ट्रीक बसही दिल्या गेल्या नाहीत व चार्जिंग स्टेशनचीही सुविधाही उपलब्ध नाही. नवीन लालपरीच्या बसेस २० दिल्या जाणार असल्याची माहिती होती, त्याही दहाच दिल्या गेल्या. शिवशाही बसेस वापरू नका अशी प्रवाशांची सातत्याने मागणी असताना, लोकप्रतिनिधींनीही ही मागणी केलेली असताना त्याकडे दुर्लक्ष करत बारामती आगाराकडून शिवशाही बसेस सर्रास वापरल्या जात आहेत.