बारामती, ता. १० : येथील राज्य परिवहन मंडळाच्या बारामती आगाराच्या बारामती-मुंबई बसचा गुरुवारी (ता. १०) लोणावळयानजिक पहाटे अडीचच्या सुमारास अपघात झाला. यामध्ये बसचे चालक इर्शाद अब्दुल माजिद शेख (वय ३८) यांचा मृत्यू झाला.
बारामतीहून मुंबईकडे गुरुवारी निघालेल्या रातराणी बसची (क्र. एमएच १४- केक्यू-४९५६) एक्स्प्रेस वेवर समोरील कंटेनरला मागून धडक बसली. समोरील कंटेनरने अचानक वेग कमी केल्याने व त्या वेळेस पाऊस सुरू असल्याने अंदाज न आल्याने हा अपघात झाला आहे, असे सूत्रांनी सांगितले.
एसटीचे समोरील केबिन कंटेनरला धडकल्याने इर्शाद यांचा मृत्यू झाला. त्यांच्या मागे पत्नी व तीन मुली असा परिवार आहे. या अपघातात चालक सागर दत्तात्रेय गुंड व इतर बारा प्रवासीही जखमी झाले. काहींवर लोणावळा येथे उपचार सुरू आहेत. काही जणांवर प्राथमिक उपचार करून त्यांना सोडून देण्यात आले.

13096