बारामती, ता. ३१ : रोटरी क्लब ऑफ बारामतीच्या अध्यक्षपदी रविकिरण खारतोडे यांची तर सचिवपदी महावीर शहा (वडूजकर) यांची निवड करण्यात आली आहे. मावळते अध्यक्ष रो. अरविंद गरगटे यांनी खारतोडे यांना रोटरी कॉलर, चार्टर आणि बेल यांद्वारे पदभार प्रदान केला. उपाध्यक्षपदी महेश साळुंखे, खजिनदारपदी पार्श्वेंद्र फरसोले आदी कार्यकारिणी सदस्यांचीही यावेळी निवड करण्यात आली. रोटरी डिस्ट्रीक्ट ३१३१ चे प्रांतपाल संतोष मराठे, सहाय्यक प्रांतपाल नरेंद्र गांधी, वसंतराव माळुंजकर, माजी पोलीस अधिकारी सुरेश खोपडे आदींच्या उपस्थितीत हा पदग्रहण समारंभ झाला.
बारामती रोटरी क्लबला देणगी दिल्याबद्दल बारामती कॅटल फीडचे अजय पिसाळ आणि स्काय ॲग्रोचे दिपक बिबे या प्रतिनिधींचा सन्मान याप्रसंगी करण्यात आला. तसेच विद्यार्थ्यांच्या अभ्यासासाठी विकसित करण्यात आलेल्या ॲपचे वितरण बारामती तालुका मुख्याध्यापक संघाचे अध्यक्ष संदीप जगताप आणि सचिव सिकंदर शेख यांना करण्यात आले.
यावेळी संतोष मराठे यांनी बारामती रोटरी क्लबच्या कार्याचा गौरव केला. मावळते अध्यक्ष अरविंद गरगटे यांनी गतवर्षात केलेल्या कामाचा आढावा सादर केला. तर, खारतोडे यांनी रोटरी वर्ष २०२५-२६ मध्ये करण्यात येणाऱ्या कामांची रूपरेषा सांगितली. डॉ. अजय दरेकर यांनी सूत्रसंचालन केले तर महावीर शहा (वडूजकर) यांनी आभार मानले.