बारामती, ता. ७ : क्रीडा चळवळ अधिक मजबूत व्हावी, ग्रामीण भागातील खेळाडूंना उत्तम क्रीडा सुविधा मिळाव्यात, या उद्देशाने बारामतीत नवीन सुसज्ज क्रीडा संकुल उभे राहणार आहे. या कामासाठी राज्य शासनाने ७९ कोटी रुपयांच्या खर्चास नुकतीच प्रशासकीय मान्यता दिली आहे.
उपमुख्यमंत्री अजित पवार यांच्या पुढाकारातून बारामतीचा वाढणारा विस्तार विचारात घेत या नवीन क्रीडा संकुलाची स्थापना करण्याचा निर्णय झाला आहे. यासाठी क्रीडा विभागाने ७९ कोटी रुपयांच्या खर्चाच्या अंदाजपत्रकास प्रशासकीय मान्यता दिली आहे. यामुळे आता या संकुलाचे काम वेगाने सुरू होणार आहे.
बारामती एमआयडीसीतील कटफळ रेल्वे स्थानकानजीक २० एकरांच्या भव्य जागेत हे क्रीडा संकुल उभारले जाणार असून, यात अत्याधुनिक क्रीडा सुविधा उपलब्ध करून देण्यात येणार आहेत. क्रीडा संस्कृतीचा विकास होण्यासोबतच ग्रामीण भागातील खेळाडूंना गावातच सर्वोत्तम सुविधा या संकुलामुळे मिळतील. राज्य व राष्ट्रीय स्तरावरील स्पर्धा या निमित्ताने बारामतीत होऊ शकतील. यामुळे विविध क्रीडा प्रकारांना चालना मिळणार असून, यातून राष्ट्रीय व आंतरराष्ट्रीय खेळाडू घडू शकतील.
पुण्यातील बालेवाडी क्रीडा संकुलाच्या धर्तीवर बारामतीचे नवीन क्रीडा संकुल विकसित करण्याचा उपमुख्यमंत्री पवार यांचा मानस आहे. या क्रीडा संकुलाची निर्मिती करताना अत्याधुनिक तंत्रज्ञानाचा वापर करून त्याची उभारणी होईल. खेळाडूंना सर्वतोपरी सुविधा या निमित्ताने निर्माण करून देण्याचा त्यांचा प्रयत्न आहे.

बारामतीत साकारणाऱ्या नवीन क्रीडा संकुलामुळे ग्रामीण भागातील होतकरू खेळाडूंना उत्तम सुविधा मिळतील. त्यांना त्यांचे क्रीडा नैपुण्य दाखविता येईल. यामुळे राष्ट्रीय व आंतरराष्ट्रीय खेळाडू घडू शकतील.
-महेश चावके, तालुका क्रीडा अधिकारी, बारामती

या असतील सुविधा.....
चारशे मीटरचा सिंथेटिक ट्रॅक, जलतरण तलाव, शूटींग रेंज, आर्चरी रेंज, सायकलींग ट्रॅक, स्केटिंग ट्रॅक, संपूर्ण विद्युतीकरण होणार, ७०० खेळाडू क्षमतेचे वसतिगृह उभारणार, सुसज्ज पॅव्हेलियनची निर्मिती होणार, प्रेक्षक गॅलरीची उभारणी केली जाणार, ४०० मीटरचा साधा ट्रॅकही होणार, निवास व भोजनाचीही व्यवस्था असणार.