बारामती, ता. ९ : शहरातील एका डायग्नोस्टिक सेंटरने चुकीचा रक्तगट दिल्याप्रकरणी संबंधित सेंटरची सेवा तात्पुरती बंद करण्यासह चौकशी सुरु केली आहे.
एका गर्भवतीला चुकीचा रक्तगट दिल्याने तिच्या जिवाला धोका निर्माण झाला होता. या प्रकरणी या सेंटरविरूद्ध विनय दामोदरे यांनी तक्रार दाखल केली असून, या प्रकरणी संबंधित सेंटरची चौकशी आता सुरु झाली आहे. बारामतीतील वेलनेस डायग्नोस्टिक सेंटरने एका महिलेचा रक्तगट बी निगेटीव्ह असल्याचा अहवाल दिला होता. प्रत्यक्षात रक्तपेढीमध्ये रक्ताची पिशवी आरक्षित करताना शंका निर्माण झाली. त्यामुळे पुन्हा दुसऱ्या प्रयोगशाळेत रक्तगट तपासल्यानंतर तो बी पॉझिटीव्ह असल्याचे समोर आले. या घटनेने या प्रयोगशाळेच्या विश्वासार्हतेवरच शंका निर्माण झाली. या संदर्भात विनय दामोदरे यांनी केलेल्या तक्रारीची दखल घेत सिल्व्हर ज्युबिली रुग्णालयाचे वैद्यकीय अधीक्षक डॉ. महेश जगताप यांनी चौकशी पूर्ण होईपर्यंत या डायग्नोस्टिक सेंटरची सेवा तात्पुरती बंद ठेवण्याचे आदेश दिले आहेत.