चाकण, ता. १८ : दावडमळा (ता. खेड) येथील टेक्नो ड्राय सिस्टीम इंजिनिअरिंग प्रा.लि. या कंपनीच्या सुरक्षारक्षकांना चाकूचा धाक दाखवून शुक्रवारी (ता. १७) रात्री दोनच्या सुमारास चोरी झाली. याबाबत गोरक्षनाथ गोविंद गायकवाड (वय ३६, रा. कुरुळी, ता. खेड) यांनी फिर्याद दिली. या प्रकरणी अनोळखी पाच ते सहा आरोपीवर गुन्हा दाखल केला आहे.
याबाबत चाकण पोलिस ठाण्याचे वरिष्ठ पोलिस निरीक्षक वैभव शिंगारे, पोलिस निरीक्षक अनिल देवडे यांनी माहिती दिली की, पाच ते सहा अनोळखी आरोपींनी कंपनीत येऊन सुरक्षारक्षक दिलनवाज मोहमंद शफीखान याला धमकी देऊन चाकूचा धाक दाखवून कंपनीचे गेट उघडून दुसरा सुरक्षारक्षक नामदेव मरीबा भोगे याला धमकी देऊन दोरीने बांधून एका छोट्या टेंपोमध्ये कंपनीतील सातशे किलो स्टेनलेस स्टील व शंभर किलो माईल्ड स्टील, असे आठशे किलो स्क्रॅप माल (अंदाजे किंमत ९१ हजार ३०० रुपये) चाकूचा धाक दाखवून बळजबरीने टेम्पोत भरून चोरी करून नेला, असे फिर्यादीत म्हटले आहे.