चाकण, ता. ७ : खराबवाडी (ता. खेड) येथे प्रियकराने केलेल्या जबर मारहाणीत प्रेयसीचा मृत्यू झाला. तसेच, तीच्या मुलांनाही प्रियकराने मारहाण केली. अंतिमा पांडे (वय ३८), असे खून झालेल्या महिलेचा नाव असून, या प्रकरणी आरोपी सचिन रामआसरे यादव (वय २३, मूळ रा. चंपापूर ता. हडीया, जि. अलाहाबाद, उत्तर प्रदेश, सध्या. रा. चाकण, ता. खेड) याला अटक केली आहे.
याबाबत महाळुंगे पोलिस ठाण्याचे वरिष्ठ पोलिस निरीक्षक दिगंबर सूर्यवंशी यांनी माहिती दिली की, आरोपी यादव हा मोटारचालक आहे, तर अंकिता ही एका कंपनीत काम करत होती. आरोपी सचिन तिच्याशी संशयावरून सतत भांडण करत होता व तिला मारहाण करायचा. तो मंगळवारी (ता. ५) सायंकाळी सहा ते साडेआठच्या दरम्यान तिच्या घरी गेला व तिला प्लॅस्टिकचे स्टूल, लाकडी काठी याने पाय, दोन्ही हात व डोक्यावर जबर मारहाण केली. तिच्या पोटावर चाकू लावून, ‘आज तुला जीवे मारतो,’ असे म्हणून धमकी दिली. तसेच, तिला जबर मारहाण केली. त्यावेळी तिची मुलगी व मुलगा मध्ये पडले असता त्यांनाही त्याने दमदाटी केली.