चास, ता. २२ ः चास (ता. खेड) व पंचक्रोशीत श्रावणी बैलपोळा आनंदात साजरा करण्यात आला. पारंपरिक वाद्यांच्या गजरात निघालेल्या बैलांच्या भव्य मिरवणुकीत बळिराजा आनंदाने सहभागी झाला होता. यावेळी दुपारी उशिरा मिरवणुका सुरू होऊन सायंकाळी लवकरच मिरवणुका संपुष्टात आल्या.
पूर्वी बैलपोळ्याच्या दिवशी सकाळीच बळिराजा आपल्या लाडक्या सर्जा- राजाला नदी तीरावर नेऊन स्वच्छ अंघोळ घालून घरी आणून पाठीवर झूल घालून, शिंगे सोनेरी रंगाने रंगवून, गुलाल- भंडाऱ्याने सजवत होता व गोड पुरणाच्या पोळीने बैलांचे तोंड गोड करत होता. मात्र आजच्या आधुनिक युगात पावसाच्या अनिश्चितते बरोबरच लागवडी खालील जमिनीचे कमी होणारे क्षेत्र यामुळे पशुधन संभाळण्यापेक्षा यांत्रिकरणाकडे वळालेल्या शेतकऱ्यांच्या दारात बैलांची संख्या मर्यादित झालेली आहे.
बैलपोळ्यानिमित्त सकाळीच शेतकऱ्यांनी आपल्या घरासमोरच लाडक्या पशुधनाला स्वच्छ अंघोळ घालून पाठीवर झुली घालून गुलाल- भंडाऱ्याची उधळण करीत शिंगांना रंग व फुगे बांधून गावातून पारंपरिक वाद्यांच्या म्हणजेच हलगी डफड्याच्या बरोबरच डीजेच्या दणदणाटात बैलांच्या भव्य मिरवणुका काढण्यात आल्या. या मिरवणुकीत प्रामुख्याने चास, तसेच पंचक्रोशीतील व परिसरातील शेतकऱ्यांनी मोठ्या उत्साहाने आपापली बैले आणून मिरवणुकीत सहभाग घेतला. गेल्या काही वर्षांपासून बैलांची संख्या कमी झाल्याने चालू वर्षीही मिरवणुका सायंकाळी लवकरच संपुष्टात आल्या.

03749