दौंड, ता. ७ : आषाढी वारीसाठी पंढरपूर येथे चारचाकी वाहनातून निघालेल्या भजनी मंडळातील एका अल्पवयीन मुलीवर स्वामी चिंचोली (ता. दौंड) येथे ३० जून रोजी अत्याचार आणि तिच्या कुटुंबीयांच्या डोळ्यात मिरचीपूड टाकून तीन महिलांच्या अंगावरील दीड लाख रुपयांचे सोन्याचे दागिने शस्त्र दाखवून लुटण्यात आले होते. याप्रकरणी दोन आरोपींना अटक केली असून, त्यांची कोठडीत रवानगी केली आहे.
याबाबत दौंड पोलिस ठाण्याचे निरीक्षक गोपाळ पवार यांनी सोमवारी (ता. ७) माहिती दिली की, या अत्याचार व जबरी चोरी प्रकरणी अमिर सलीम पठाण (वय २८, रा. अकलूज, ता. माळशिरस, जि. सोलापूर) व विकास नामदेव सातपुते (वय २६, रा. भिगवण, ता. इंदापूर) या दोन संशयितांना अटक केली आहे. पुणे ग्रामीण पोलिस दलाच्या तपास पथकांनी पठाण याला रांजणगाव (ता. शिरूर) येथून, तर सातपुते याला भिगवण येथून ताब्यात घेतले. त्यांना रविवारी ( ता. ६) बारामती येथील न्यायालयात हजर केले असता पाच दिवस पोलिस कोठडीत ठेवण्याचे आदेश दिले आहे. पठाण याच्यावर यापूर्वी पुणे शहर व ठाणे येथे चोरी, घरफोडी व अन्य गुन्हे, असे एकूण १७ गुन्हे दाखल आहेत. त्याची बहीण ही सातपुते याची पत्नी आहे. दोघांचेही दुसरे लग्न आहे.