डोर्लेवाडी, ता. १८ : ‘हर हर महादेव’चा गजर करत शेवटच्या श्रावणी सोमवारनिमित्त सोनगाव (ता. बारामती) येथील सोनेश्‍वर मंदिरात भाविकांनी होडीतून जाऊन दर्शनासह पर्यटनाचा आनंद घेतला.
येथील मंदिरात पहाटे देवस्थान ट्रस्टचे अध्यक्ष संदेश गीते यांच्या हस्ते सपत्नीक विधिवत पूजा व अभिषेक करण्यात आला. मंदिरात फुलांची सजावट करण्यात आली होती. सकाळपासूनच भाविकांनी दर्शनासाठी गर्दी केली होती. दिवसभर परिसरातील भजनी मंडळाने एकतारीच्या सुरात भजने सादर केली. येणाऱ्या भाविकांसाठी सोनेश्‍वर देवस्थान ट्रस्ट आणि मान्यवरांकडून ३०० किलो फराळ, दूध, केळी वाटप करण्यात आले. दुपारी तीन वाजता लक्ष्मण महाराज कोकाटे कन्हेरी यांचे कीर्तन झाले. बारामती तालुका पोलिस ठाण्याच्या वतीने बंदोबस्त ठेवण्यात आला होता. प्राथमिक आरोग्य केंद्राच्या वतीने भाविकांची आरोग्य तपासणी करण्यात आली.
सोनेश्‍वर मंदिरात पुणे, सातारा, सोलापूर जिल्ह्यातील भाविक दर्शनासाठी येतात. नदीला मुबलक पाणी आल्यामुळे व दर्शनासाठी होडीची सुविधा असल्याने येथे आलेले भाविक दर्शनासह पर्यटनाचाही आनंद घेतात.