घोडेगाव, ता. ८ : शिनोली (ता. आंबेगाव) येथील शेठ पिरोजशहा गोदरेज सभागृहात गुरुवारी (ता. १०) भीमाशंकर गुरुकुल प्रतिष्ठानच्या वतीने जिल्हा परिषद शाळेत शिक्षण घेत असलेल्या तालुक्यातील ९६ विद्यार्थ्यांना शैक्षणिक किटचे वाटप होणार आहे, याबाबतची माहिती अध्यक्ष नंदकुमार येवले व सचिव मच्छिंद्रनाथ झांजरे यांनी दिली.
तालुक्यातील अनाथ, निराधार, गरजू मुलांना दत्तक घेऊन साहित्य वाटपाचा उपक्रम २०१७-१८ पासून सुरू असून यंदाचे हे आठवे वर्ष आहे. पुणे जिल्हा परिषदेचे शिक्षण अधिकारी संजय नाईकडे यांच्या हस्ते व शारदा प्रबोधिनीचे संस्थापक पांडुरंग महाराज येवले यांच्या अध्यक्षतेखाली हा कार्यक्रम पार पडणार आहे.
पुणे जिल्हा शिक्षक संघाचे माजी अध्यक्ष दत्तात्रेय वाळुंज, नंदकुमार येवले, सुरेंद्र डोके, किसन कोंढवळे या शिक्षकांनी उपक्रमाची सुरुवात केली. या उपक्रमात नारायण काळे, सुनील पाटील, सुनील बुरसे, किसन शिंगाडे, ईश्वर फदाले, प्रदीप चासकर, आनंद संत हे शिक्षक सहभागी आहेत. त्याचबरोबर नवनियुक्त गटशिक्षणाधिकारी, पदोन्नती मिळालेले विस्तार अधिकारी, सेवानिवृत्त विस्तार अधिकारी, केंद्रप्रमुख, मुख्याध्यापक यांचा सत्कार यावेळी करण्यात येणार असल्याचे येवले व झांजरे यांनी सांगितले.