इंदापूर, ता. १८ : तंत्रशिक्षण संचालनालय, महाराष्ट्र राज्याने २०२५-२६ शैक्षणिक वर्षासाठी पोस्ट-एसएससी (दहावी नंतरचे) अभियांत्रिकी पदविका अभ्यासक्रमांच्या प्रथम वर्षाच्या प्रवेशासाठी अर्ज सादर करण्याची अंतिम मुदत २६ जून २०१५ पर्यंत वाढवली आहे. विद्यार्थ्यांना आवश्यक कागदपत्रे जसे की गुणपत्रके, जातीचा दाखला, नॉन-क्रिमीलेअर प्रमाणपत्र, उत्पन्नाचा दाखला आदी मिळण्यात अडचणी येत असल्यामुळे आणि अर्ज प्रक्रिया सुरळीत पार पडावी, या हेतूने ही मुदतवाढ केली आहे.
याबाबत माहिती देताना विद्या प्रतिष्ठानच्या पॉलिटेक्निक कॉलेज, इंदापूरचे प्राचार्य डॉ. सुजय देशपांडे म्हणाले की, या प्रवेश प्रक्रियेमध्ये विद्यार्थ्यांनी ऑनलाइन नोंदणी, कागदपत्रांची अनलोडिंग, कागदपत्र पडताळणी, अर्ज निश्‍चिती ही सर्व प्रक्रिया २६ जून २०२५ पर्यंत पूर्ण करणे आवश्यक आहे. ही मुदतवाढ विद्यार्थ्यांना गुणपत्रक, जातीचा दाखला, नॉन-क्रिमीलेअर प्रमाणपत्र, उत्पन्नाचा दाखला यांसारखी आवश्यक कागदपत्रे मिळवण्यासाठी आणि संपूर्ण अर्ज प्रक्रिया पूर्ण करण्यासाठी दिली आहे याचा लाभ घ्यावा.
तसेच डिप्लोमा अभ्यासक्रम फायद्याचा असून, एक अल्पकालीन (३ वर्षांचा) आणि कमी शुल्कात उपलब्ध असलेला व्यावसायिक अभ्यासक्रम आहे, जो थेट नोकरीच्या संधी उघडतो. यामध्ये शिकलेल्या विद्यार्थ्यांना लगेच नोकरीच्या संधी उपलब्ध होतात. डिप्लोमा अभ्यासक्रम पूर्ण केल्यानंतर विद्यार्थी कनिष्ठ अभियंता, तांत्रिक सहाय्यक, प्रयोगशाळा सहाय्यक, प्रॉडक्शन सुपरवायझर, ऑटोमोबाईल टेक्निशियन, सीएनसी ऑपरेटर, सीएडी डिझायनर यांसारख्या विविध पदांवर लगेचच नोकरी मिळवू शकतात. विशेषतः ग्रामीण व निमशहरी भागातील विद्यार्थ्यांसाठी हा अभ्यासक्रम उत्पन्नाचे एक प्रभावी साधन ठरतो. ग्रामीण भागातील विद्यार्थ्यांसाठी हे उत्पन्नाचे एक स्थिर स्रोत ठरू शकते, असेही डॉ. देशपांडे म्हणाले.

डिप्लोमा अभियांत्रिकीचे प्रमुख फायदे :
• अल्प कालावधीचा अभ्यासक्रम (३ वर्षे)
• कमी शुल्कात व्यावसायिक शिक्षण
• दहावीनंतर थेट प्रवेशाची संधी
• उद्योग क्षेत्रात जलद नोकरीची शक्यता
• बीई/बीटेकला थेट दुसऱ्या वर्षात प्रवेश
• स्वतंत्र व्यवसाय सुरू करण्याची संधी (उदा. इलेक्ट्रिकल, मशिनिंग, ऑटो सर्व्हिसिंग)