जेजुरी, ता. ७ : जेजुरी व श्री. क्षेत्र कडेपठार (ता. पुरंदर) येथे भाविकांच्या वतीने आग आटोक्यात आणण्यासाठी २० संयंत्रे मोफत देण्यात आली. गडावरील अग्निसुरक्षेच्या दृष्टीने ही संयंत्रे महत्त्वाची आहेत. भविष्यात गडावरील गर्दीच्या ठिकाणी अचानक आग लागल्याचा प्रकार घडल्यास या सयंत्रामुळे आग नियंत्रित होण्यासाठी कायमस्वरूपी मदत होणार आहे.
पुणे येथील अग्निशमन अधिकारी शिवाजी मेमाणे, अग्निशमन अधिकारी विजय मोटे, उद्योजक योगेश नामदे या भाविकांच्या वतीने संयंत्रे देण्यात आली आहेत. यापैकी १३ सयंत्रे कडेपठार येथे, तर सात सयंत्रे जेजुरी येथे बसवण्यात आली. भाजप महिला प्रदेश उपाध्यक्षा कांचन कुल यांच्या हस्ते सयंत्रांचे पूजन करण्यात आले. त्यानंतर या अधिकाऱ्यांनी आग आटोक्यात आणण्याचे प्रशिक्षण‌ व प्रात्यक्षिक स्थानिक कर्मचाऱ्यांना दिले.
यावेळी कांचन कुल म्हणाल्या की, ‘‘अखंड महाराष्ट्राचे कुलदैवत असणाऱ्या खंडोबाच्या जेजुरी येथे वर्षभर गर्दी असते. भाविकांच्या सुरक्षेच्या दृष्टीने अग्निशमन दलाने स्तुत्य उपक्रम राबवला आहे.’’
अग्निशमन अधिकारी शिवाजी मेमाणे म्हणाले की, ‘‘कुलदैवत असणाऱ्या जेजुरी येथे वारंवार येण्याचा योग्य येतो. कडेपठार व जेजुरी दोन्ही ठिकाणी उंचावर असल्याने अचानक आग लागल्यास आग आटोक्यात आणण्यासाठी यंत्रणा लावणे अडचणीचे ठरू शकते. त्यामुळे जीवितहानी व वित्तहानी टाळण्यासाठी, तसेच भाविकांच्या सुरक्षेच्या दृष्टीने आम्ही अग्निशमन संयंत्रे देण्याचा निर्णय घेतला.’’
यावेळी देवस्थानचे विश्वस्त मंगेश आगलावे यांच्या हस्ते मान्यवरांचा सत्कार करण्यात आला. यावेळी मयूर दीडभाई, दिनेश गडधे, गणेश दोरगे, आदिनाथ नातू, ऋषिकेश धायगुडे, सोमनाथ जाधव, अजित भोसले, प्रदीप चव्हाण आदी उपस्थित होते.

03378, 03379