जुन्नर : श्री लेण्याद्री गणपती देवस्थानच्या वतीने गोळेगाव (ता. जुन्नर) येथील प्राथमिक शाळेतील विद्यार्थ्यांना शैक्षणिक साहित्याचे वाटप करण्यात आले. मुख्याध्यापक मोहन नाडेकर यांना आदर्श शिक्षक व वैष्णवी माळी हिस गुणवंत विद्यार्थिनी पुरस्काराने सन्मानित करण्यात आले.
शाळा व्यवस्थापन समिती अध्यक्षा प्रियांका ताम्हाणे यांनी ध्वजवंदन केले. देवस्थानचे अध्यक्ष संजय ढेकणे यांच्या अध्यक्षतेखाली झालेल्या कार्यक्रमात विद्यार्थ्यांनी कवायत प्रकार, समूहगीतांचे सादरीकरण केले. देवस्थानच्या वतीने शाळेतील १४ दत्तक विद्यार्थ्यांना ३६ हजार रुपयांचे शालेय साहित्य वाटप करण्यात आले. वनक्षेत्रपाल प्रदीप चव्हाण यांनी वतीने विद्यार्थ्यांना २० बसकरपट्टया दिल्या. पहिली ते बारावीच्या प्रथम तीन क्रमांकाच्या विद्यार्थ्यांना तसेच शिष्यवृत्ती परीक्षा, मंथन परीक्षा, सामान्य ज्ञान परीक्षा, इस्रो-नासा निवड चाचणी परीक्षेत निवड झालेल्या विद्यार्थ्यांना रोख बक्षीस देण्यात आली. यावेळी लेण्याद्री देवस्थानचे सचिव शंकरराव ताम्हाणे, विश्वस्त सदाशिव ताम्हाणे काशिनाथ लोखंडे, भगवान हांडे,राजेश बिडवई, अरविंद बिडवई, अर्चना ताम्हाणे, पल्लवी वाणी, गणेश लोखंडे, माजी सैनिक सुभाष बिडवई, रामदास मेहेर आदी उपस्थित होते. मुख्याध्यापक मोहन नाडेकर यांनी प्रास्ताविक, तर दत्तात्रेय उगले यांनी सूत्रसंचालन केले. किरण पवार यांनी आभार मानले.