काटेवाडी, ता. १८ : अजितदादांची नेहमीच भेट होत असते. मतदानाच्या वेळी देखील ते भेटले. तेव्हा ते म्हणाले की, आमच्या पॅनेलला मतदान करा. तेव्हा मी म्हणालो आमचे तुमचे असं काही नाही हे शेतकऱ्यांचे पॅनेल आहे, अशी प्रतिक्रिया माजी मंत्री हर्षवर्धन पाटील यांनी उपमुख्यमंत्री अजित पवार यांच्यासोबत झालेल्या भेटी संदर्भात व्यक्त केली. तसेच कारखाना सुस्थितीमध्ये आणायचा असेल तर पृथ्वीराज जाचक यांच्या नेतृत्वाखालील पॅनेल निवडून द्यायला हवे, अशी पुष्टी देखील यावेळी हर्षवर्धन पाटील यांनी जोडली.
भवानीनगर येथील श्री छत्रपती सहकारी साखर कारखान्याच्या संचालक मंडळ निवडणुकीसाठी माजी मंत्री हर्षवर्धन पाटील यांनी रविवारी (ता. १८) भवानीनगर येथे मतदान केले. दरम्यान, उपमुख्यमंत्री अजित पवार व हर्षवर्धन पाटील यांची मतदान स्थळी भेट झाली. या दोघांमध्ये काही काळ संवाद देखील झाला. यावेळी ते पुढे म्हणाले की, मुळात सहकारांमध्ये पक्ष वगैरे काही नसतो. सर्व पक्षांनी एकत्र येऊन या ठिकाणी पॅनेल उभा केला आहे. एकंदरीत महाराष्ट्रातील सर्वच ठिकाणी सहकारातील साखर कारखानदारी अडचणीत आहे. ऊस पिकवणारा शेतकरी साखर कारखान्यात काम करणारे कामगार देखील अडचणीत आहेत. अशा वेळेस साखर कारखानदारी मध्ये कोणत्याही प्रकारचे राजकारण न आणता शेतकरी व कामगारांच्या हितासाठी एकत्रित येऊन या संस्था व्यवस्थित चालवाव्यात. राजकीय मतभेद बाजूला ठेवून सर्वच नेत्यांनी यासाठी एकत्र यायला हवे, असेही यावेळी पाटील म्हणाले.