काटेवाडी, ता. ८ : नागपूर येथील शिक्षण अधिकाऱ्यांच्या विनाचौकशी अटकेच्या निषेधार्थ अखिल महाराष्ट्र शिक्षण सेवा राजपत्रित अधिकारी संघटनेने शुक्रवार (ता. ८) ऑगस्ट २०२५ पासून पुणे येथील शिक्षण आयुक्त कार्यालयासमोर ठिय्या आंदोलनासह राज्यव्यापी सामूहिक रजा आंदोलन सुरू केले. यामुळे शिक्षण विभागाची कार्यालये ठप्प झाली असून, सोमवारपासून आंदोलन तीव्र होण्याची शक्यता आहे.
नागपूर येथील बोगस शालार्थ आयडी प्रकरणात शिक्षण विभागातील उपसंचालकांसह अधिकाऱ्यांना विनाचौकशी अटक केल्याने अखिल महाराष्ट्र शिक्षण सेवा राजपत्रित अधिकारी संघटनेने तीव्र नाराजी व्यक्त केली आहे. यामुळे पुणे येथील शिक्षण आयुक्त कार्यालयासमोर वर्ग एक आणि दोनचे सुमारे शंभर अधिकारी ठिय्या आंदोलन करत आहेत. जिल्हास्तरावरही निवेदन देऊन आंदोलनाला सुरुवात झाली आहे. मुख्याध्यापक आणि शिक्षक संघटनांनीही समर्थन दर्शवले आहे. संघटनेचे अध्यक्ष शेषराव बडे यांनी सांगितले की, प्रशासनिक जबाबदाऱ्या पार पाडताना झालेल्या त्रुटींसाठी योग्य चौकशी न करता थेट अटक करणे दुर्दैवी आहे. यामुळे अधिकाऱ्यांमध्ये असुरक्षिततेची भावना आणि भयाचे वातावरण निर्माण झाले आहे.

संघटनेने चार प्रमुख मागण्या
नागपूर येथील घटनेची तातडीने चौकशी करून निर्दोष अधिकाऱ्यांची मुक्तता, भविष्यात कारवाईपूर्वी पूर्ण चौकशी, अधिकाऱ्यांचे मनोबल वाढवण्यासाठी शासनाचे स्पष्ट निर्देश, आणि या प्रकरणी शासनाने अधिकृत निवेदन जाहीर करावे. या मागण्या मान्य न झाल्यास आंदोलन तीव्र होईल, असे संघटनेने स्पष्ट केले.
01217