मंचर, ता. २३ : मंचर (ता. आंबेगाव) येथील शिवस्मारक समिती व ग्रामदैवत श्री भैरवनाथ उत्सव समितीच्या वतीने शिवजयंती सांस्कृतिक महोत्सव २०२५ निमित्त लोकनेते माजी खासदार स्वर्गीय किसनराव बाणखेले स्मृती व्याख्यानमाला ३९व्या ज्ञानसत्राचा प्रारंभ शुक्रवारी (ता. २५) संध्याकाळी सात वाजता छत्रपती शिवाजी महाराज चौकात होणार आहे. सांगता बुधवारी (ता. ३०) होणार आहे, अशी माहिती शिवस्मारक समितीचे कार्याध्यक्ष कामगार नेते ॲड बाळासाहेब लक्ष्मण बाणखेले यांनी दिली.
शुक्रवारी हृदयरोग तज्ञ डॉ. हसमुख गुजर (पुणे) यांचे ‘वाढते हृदय विकार आणि वैद्यकीय उपचार पद्धती या विषयावर व्याख्यान होणार आहे. शनिवारी (ता. २६) कवी चंद्रकांत वानखेडे (पुणे) यांचे ‘शेती, माती वरील जगणे या विषयावर विविध कविता, रविवारी अखिल भारतीय आरोग्यसेनेचे अध्यक्ष डॉ. अभिजित वैद्य (पुणे) यांचे ‘समाज सुधारकांची शिकवण आणि सद्यःस्थितीत युवकांचा सहभाग’, सोमवारी डॉ. वर्षा तोडमल (पुणे) यांचे ‘ज्येष्ठत्वाकडून श्रेष्ठत्वाकडे’ याविषयावर व्याख्यान, मंगळवारी प्रा. मारुती यादव यांचा ‘आनंदाची लयलूट’ हा विनोदी एकपात्री प्रयोग, बुधवारी हिंगोली येथील शिवचरित्र व्याख्याते शेख सुभान अली यांचे ‘छत्रपती शिवाजी महाराजांचे स्वराज्याचे व्यवस्थापन’ या विषयावर व्याख्यान होणार आहे. व्याख्यान मालेला नागरिकांनी उपस्थित राहावे, असे आवाहन यात्रा समितीचे अध्यक्ष दत्तात्रेय थोरात व कार्याध्यक्ष वसंतराव बाणखेले यांनी केले आहे.