मंचर, ता. ७ : ‘‘मंचर (ता.आंबेगाव) येथे राज्य परिवहन महामंडळाच्या बस स्थानकावर मोठ्या प्रमाणात खड्डे पडले आहेत. या खड्ड्यांमुळे प्रवाशांचे अतोनात हाल होतात. ये-जा करताना खड्डे ओलांडूनच एस.टी. गाडीत प्रवेश करावा लागतो. या स्थितीत अपघात होण्याची शक्यता असल्यामुळे तातडीने खड्डे बुजविण्याचे काम करावे. अन्यथा आंदोलन करावे लागेल.’’ असा इशारा राष्ट्रवादी काँग्रेस शरदचंद्र पवार पक्षाचे पुणे जिल्हा सरचिटणीस अमोल शेलार यांनी दिला आहे.
आंबेगाव तालुक्याचे मंचर बस स्थानक मध्यवर्ती ठिकाण आहे. येथे नाशिक, सुरत, इंदौर, पुणे, मुंबई, बेळगाव, सोलापूर व अलिबाग या दूरवरच्या भागातील चारशे हून अधिक एस.टी. गाड्या दररोज ये-जा करतात. वारंवार पडत असलेल्या पावसामुळे पाण्याची डबकी तयार झाली आहेत. लहान मुले, महिला व ज्येष्ठ नागरिकांना कसरत करतच प्रवास करावा लागतो. “येत्या सात दिवसांत खड्डे न बुजवल्यास आंदोलन केले जाईल.” असे निवेदनात शेलार यांनी नमूद केले आहे. निवेदनाची प्रत आगार प्रमुख यांना दिली आहे.

13340