मंचर, ता. १९ : मंचर (ता. आंबेगाव) येथील उपजिल्हा रुग्णालयात दृष्टिदान पंधरवड्यानिमित्त मोफत मोतीबिंदू शस्त्रक्रिया शिबिराचे आयोजन केले आहे. हे शिबिर सोमवार (ता. १६) ते मंगळवार (ता. २४) या कालावधीत असून याचा फायदा गरजू रुग्णांनी घ्यावा, असे आवाहन उपजिल्हा रुग्णालयाचे वैद्यकीय अधीक्षक सुशील हाडोळतीकर यांनी केले.
दरवर्षी १० जून रोजी ‘जागतिक दृष्टिदान दिन’ साजरा केला जातो. त्यानंतरचे १५ दिवस नेत्रदानाविषयी जनजागृतीसाठी ‘दृष्टिदान पंधरवडा’ म्हणून पाळला जातो. या शिबिरात गुरुवार (ता. १९) पर्यंत १०४ रुग्णांची शस्त्रक्रिया केली आहे. शिबिरासाठी रुग्णांची नावनोंदणी सुरू असून सध्या दररोज आठ ते दहा रुग्णांची शस्त्रक्रिया केली जात आहे. त्यानिमित्ताने डोळ्यांची काळजी, नेत्रदान आदी विविध उपक्रमांची जनजागृती केली जात आहे.
जिल्हा शल्य चिकित्सक डॉ. नागनाथ मपल्ले यांच्या मार्गदर्शनाखाली जिल्हा नेत्र शल्य चिकित्सक डॉ. अंजली कुलकर्णी, नेत्ररोग तज्ञ डॉ. राहुल जोशी, डॉ. विक्रम काकडे व डॉ. प्रीती रोकडे यांनी नेत्र शस्त्रक्रिया केल्या. मोनिका पल्लम, उदय बाजारे, व आशा कानवडे यांनी व्यवस्था पाहिली. आर्थिकदृष्ट्या दुर्बल घटकांतील रुग्णांना मोठा दिलासा मिळाला आहे, असे रुग्ण कल्याण समितीचे सदस्य नीलकंठ काळे यांनी सांगितले.