मंचर, ता. २० : ‘‘पुण्यातील कर्वे समाज सेवा संस्था आणि एकात्मिक आदिवासी विकास प्रकल्प कार्यालय, घोडेगाव (ता. आंबेगाव) यांच्यात नुकताच एक महत्त्वपूर्ण सामंजस्य करार झाला. या करारामुळे एमएसडब्ल्यू अभ्यासक्रमातील विद्यार्थ्यांना आदिवासी विकास क्षेत्रात थेट काम करण्याची व प्रत्यक्ष अनुभव घेण्याची सुवर्णसंधी उपलब्ध होणार आहे,’’ अशी माहिती घोडेगाव येथील एकात्मिक आदिवासी विकास प्रकल्पाचे प्रकल्प अधिकारी प्रदीप देसाई यांनी दिली.
या करारामार्फत विद्यार्थ्यांना आदिवासी विकास योजना, क्षेत्रातील सामाजिक व प्रशासकीय आव्हाने, शासकीय योजनांची अंमलबजावणी, प्रकल्प व्यवस्थापन, सामाजिक कार्यक्रमांचे नियोजन आणि मूल्यांकन यांसारख्या विविध बाबींचे प्रत्यक्ष प्रशिक्षण दिले जाणार आहे.
कर्वे समाज सेवा संस्थेचे प्राचार्य महेश ठाकूर यांनी सांगितले, ‘‘या सामंजस्यामुळे आमच्या एमएसडब्ल्यू विद्यार्थ्यांना पुस्तकी ज्ञानासोबतच प्रत्यक्ष क्षेत्रात काम करण्याची अमूल्य संधी मिळणार आहे. आदिवासी समाजाच्या विकासात विद्यार्थी सक्रिय सहभाग देतील, याचा विश्‍वास आहे.’’

विद्यार्थ्यांना असा होईल फायदा
• कर्वे समाज सेवा संस्था विद्यार्थ्यांची इंटर्नशिपसाठी शिफारस व मार्गदर्शन करणार.
• आदिवासी विकास प्रकल्प कार्यालय विद्यार्थ्यांना कार्यालयीन कामकाज, प्रकल्प अंमलबजावणी व संबंधित कार्यात प्रत्यक्ष सहभागी करून मार्गदर्शन आणि प्रशिक्षण देणार.
• १२ जून २०२५ पासून पुढील एक वर्ष करार लागू राहणार असून, दोन्ही संस्थांच्या सहमतीने कालावधी वाढवण्याची तरतूद आहे.