मंचर, ता. ४ : मंचर ते घोडेगाव (ता. आंबेगाव) रस्त्यावर चिंचपुरे मळा- मंचर येथे सोमवारी (ता. ४) दुपारी बारा वाजता दोन मोटरसायकल व इको वाहनाच्या झालेल्या विचित्र अपघातात शिक्षक अजय मनोहर आढळराव पाटील (वय ३२, रा. लांडेवाडी, ता. आंबेगाव) यांचा जागीच मृत्यू झाला. दुसऱ्या मोटरसायकलवरील प्रतीक संतोष कोकरे (वय २२, रा. निरगुडसर, ता. आंबेगाव) हे गंभीर जखमी झाले आहेत.
आढळराव पाटील हे आपल्या शिक्षक पत्नी प्रतिमा व अडीच वर्षाच्या कन्या मायरा हिला मंचर येथील मुळेवाडी रस्त्यावर असलेल्या न्यू ऑक्सफर्ड स्कूलमध्ये सोडून लांडेवाडीकडे परत मोटरसायकलवरून (क्र. एम.एच.१२ के.सी.८७३९) जात होते. त्याच वेळी त्यांच्या शेजारी प्रतीक कोकरे यांची मोटरसायकल (क्र. एम.एच.१४ एल.सी.१४२५) आली. दोन्ही मोटरसायकलचे हँडल एकमेकाला अडकले व त्यातून दोघांच्याही मोटरसायकलचा तोल जाऊन हेलकावे सुरू झाले.
अशा अवस्थेतच घोडेगावहून मंचरच्या दिशेने येणाऱ्या इको वाहनाची (क्र. एम.एच.४८ बी.टी.१६७८) जोरदार धडक बसली. या धडकेत अजय आढळराव पाटील यांच्या मोटरसायकलचा अक्षरशः चक्काचूर झाला. वाहनाचे मागील चाकही निखळले होते. त्यांना तातडीने मंचर उपजिल्हा रुग्णालयात नेण्यात आले, मात्र डॉक्टरांनी त्यांना मृत घोषित केले.
या अपघातात प्रतीक कोकरे गंभीर जखमी असून, त्यांच्यावर मंचर उपजिल्हा रुग्णालयात उपचार सुरू आहेत.
मंचर पोलिसांनी घटनास्थळी धाव घेतली असून पोलीस हवालदार विनोद जांभळे यांनी पंचनामा करून पुढील तपास सुरू केला आहे.