मंचर, ता. ७ : ‘‘गंगोत्रीत पोहचल्यानंतर काही क्षणातच निसर्गाचा कोप झाल्याने भूस्खलन होऊन संपूर्ण मार्ग बंद झाले. दैव बलवत्तर म्हणून आम्ही या भयानक संकटातून वाचलो. दहा ते पंधरा मिनिटांच्या फरकाने आमचा गट दुर्घटना ठिकाण धराली येथील मार्गावरून पुढे गेला होता,’’ अशा शब्दांत गंगोत्री (उत्तराखंड) येथील ढगफुटीचा थरार सांगितला.
अवसरी खुर्द (ता. आंबेगाव) येथील विद्यालयातील इयत्ता दहावीचे २४ माजी विद्यार्थी दर्शनासाठी गंगोत्री येथे गेले होते. मात्र, मंगळवारी (ता. ५) गंगोत्री परिसरात मोठ्या प्रमाणावर झालेल्या ढगफुटीमुळे अडकण्याचा थरारक प्रसंग घडला. त्यांच्यापैकी मुख्याध्यापक विठ्ठल खेडकर, सहाय्यक पोलिस निरीक्षक अशोक टेमकर, अशोक भोर, माणिक ढोरे या चौघांनी हिमतीने २५ किलोमीटरचा पायी प्रवास करून नातेवाईकांशी संपर्क केला. खेडकर यांचा व्हिडिओ व्हायरल झाला असून, त्यांनी सर्व भाविक सुखरूप असल्याचा संदेश दिला. त्यामुळे चिंतेत असलेल्या नातेवाइकांना दिलासा मिळाला.
घडलेल्या थरारक प्रसंगाची माहिती खेडकर यांनी ‘सकाळ’ला सांगितली. ते म्हणाले, ‘‘गंगोत्री परिसरातील हवामान प्रतिकूल असून, सतत पावसामुळे विजेचे खांब कोसळले. संपर्क यंत्रणा कोलमडल्या आहेत. बाहेर संपर्क करणे अशक्य झाले होते. गावी काय परिस्थिती असेल, याची कल्पना येऊ लागल्याने तातडीने संपर्क करावा, या उद्देशाने आम्ही चौघे गंगोत्रीहून गुरुवारी (ता. ७) पहाटे साडेचारला निघालो. भूस्खलन झालेल्या भागात प्रवेश केला. तिथे थांबवलेल्या लष्कराच्या जवानांनी पुढे जाणे धोकादायक असल्याचे सांगितले. मात्र, ‘आम्हाला फक्त संपर्क क्षेत्रात जायचे आहे, नंतर आम्ही तुमच्या स्वाधीन होऊ,’ असे त्यांनी विनवले. त्यानुसार लष्कराने आम्हाला चार किलोमीटरवरील हेलिपॅडवर पोहोचवले. सर्व सुरक्षित असल्याचा संदेश नातेवाइकांना दिला.’’

आमच्यापैकी अशोक टेमकर माघारी फिरून गंगोत्रीला माहिती देण्यासाठी पायी गेले. आम्हा तिघांना लष्कराच्या हेलिकॉप्टरने उत्तरकाशी जवळील आर्मी कॅम्पवर आणण्यात आले आहे. उर्वरित आमच्या समवेत असलेल्या यात्रेकरूंना हेलिकॉप्टरने आणण्याची व्यवस्था प्रशासनाने केली आहे.
- अशोक भोर