मंचर, ता. ७ : आंबेगाव तालुक्यातील पाच जिल्हा परिषद गट व दहा पंचायत समिती गणाच्या मतदानाची मतमोजणी सोमवारी (ता. ९) अवसरी खुर्द येथील शासकीय तंत्रनिकेतन महाविद्यालयात होणार आहे. दुपारी साडेबारापर्यंत सर्व निकाल जाहीर करण्याच्या दृष्टीने नियोजन केले आहे, अशी माहिती निवडणूक निर्णय अधिकारी तथा आंबेगाव जुन्नर विभागाचे प्रांतधिकारी गोविंद शिंदे यांनी दिली.
ते म्हणाले, ‘‘सकाळी १० वाजता मतमोजणीस सुरुवात होईल. पाच गट व दहा गणातील मतमोजणी एकाच वेळी सुरू होईल. मतमोजणी सुरळीत व पारदर्शकपणे पार पडावी, यासाठी मतमोजणी केंद्रावर आवश्यक त्या सर्व प्रशासकीय, तसेच कडक सुरक्षा व्यवस्था करण्यात आल्या आहेत. राज्य निवडणूक आयोगाच्या मार्गदर्शक सूचनांनुसार संपूर्ण मतमोजणी प्रक्रिया पारदर्शक पद्धतीने राबविण्यात येणार आहे.