मोरगाव, ता. १८ : बारामती तालुक्याच्या पश्चिम भागात वडगाव निंबाळकर व सुपा पोलिस ठाण्याच्या कार्यक्षेत्रात ग्रामसुरक्षा दल सक्रिय करून रात्रीच्या वेळी गस्त वाढवण्याची मागणी नागरिकांमधून होत आहे.
लोणी भापकर, मोरगाव, तरडोली, बाबुर्डी, चौधरवाडी, लोणी पाटी गावांत विद्युत मोटार, केबल, धान्य, रोख रक्कम, सोन्याचे दागिने चोरीच्या घटनांत वाढ झाली आहे. घटनांमुळे गावांतील नागरिकांमध्ये असुरक्षिततेची भावना निर्माण झाली आहे. याशिवाय, सध्या खरीप हंगामातील कामे सुरू असल्याने ग्रामस्थ घराला कुलूप लावून रात्रीदेखील शेतात काम करण्यासाठी जावे लागते. काही घरांमध्ये महिला व लहान मुलेच असतात. या घटनांना आळा घालण्यासाठी रात्र गस्त वाढवण्याची मागणी होत आहे. याकामात ग्रामसुरक्षा दलाची मदत घेण्याचे नागरिकांचे म्हणणे आहे. त्यानुसार स्थानिक पोलिस प्रशासनाकडून जास्तीत जास्त युवकांनी ग्रामसुरक्षा दलात सहभागी होण्याचे आवाहन करण्यात येत आहे. यासाठी ग्राम सुरक्षा यंत्रणेच्या नंबरवर नोंदणी करता येणार असल्याचे वडगाव निंबाळकर व सुपा पोलिस ठाण्याच्या वतीने सांगण्यात आले. दरम्यान, ग्रामसुरक्षा दलात सहभागी होणाऱ्यांना कार्यशाळेच्या माध्यमातून पोलिस प्रशासनाने मार्गदर्शन करण्याची मागणी नागरिकांकडून करण्यात आली आहे.