महाळुंगे पडवळ, ता. १९ : आंबेगाव तालुक्यातील कळंब, एकलहरे, वर्पेमळा, नांदूर, विठ्ठलवाडी, टाकेवाडी, महाळुंगे पडवळ, साकोरे, चास, चांडोली बुद्रुक लौकी आदी गावांत एक महिन्यापासून सुरू असलेल्या काकड आरती उत्सवाची सांगता नुकतीच झाली. कळंब येथे प्रभातफेरीचे आयोजन करून घोडनदीत दिवे विसर्जित करून सांगता करण्यात आली.
कळंब येथे आदिशक्ती कमलजादेवी माता मंदिरात कोजागरी पौर्णिमेपासून ते त्रिपुरारी पौर्णिमेपर्यंत एक महिनाभर काकड आरती सोहळा भक्तीमय वातावरणात पार पडला. या कालावधीत पहाटे मंगलचरण, अभंग, भूपाळी अभंग, वासुदेव, आंधळा, पांगुळ, गवळण, या शिवाय गणपती, देवीची, विठ्ठलाची आरती नित्यनियमाने होत असे. चैतन्य महाराज कबीर यांच्या सूचनेनुसार सुरेखाताई शिंदे यांच्या मार्गदर्शनाखाली दररोज मंदिरात ३० ते ३५ महिला, ज्येष्ठ नागरिक, तरुण मुले काकड आरती उत्सवासाठी उपस्थित राहत होते. गेल्या २२ वर्षांपासून काकड आरतीची परंपरा येथील नागरिकांनी जपली आहे. उपस्थित महिलांना दररोज चहाची व्यवस्था लक्ष्मीबाई पवार, महिलांना पहाटे मंदिरापर्यंत ने-आण करण्याची सोय सेवानिवृत्त शिक्षक रामदास शिंदे तर, मंदिराभोवती सारवून रांगोळी काढण्याचे काम सुलोचना कानडे हे गेल्या अनेक वर्षांपासून करत आहेत.
याप्रसंगी आदिशक्ती कमलजादेवी मंदिर ते कळंब ग्रामपंचायत चौक या दरम्यान प्रभात फेरी काढण्यात आली. ज्ञानोबा, तुकाराम महाराजांचा गजर करत महिलांनी फुगड्या खेळून आनंद व्यक्त केला. कळंब येथील घोडनदीच्या तीरावर दीप प्रज्वलन करून नदीपात्रात दिवे विसर्जित केले. यावेळी प्रवचनकार सुरेखा शिंदे, माजी ग्रामपंचायत सदस्या सविता भालेराव, शिक्षिका सीमा कहडणे, मंगल थोरात, विणेकरी सुमन कानडे, सुलोचना कानडे, अंजना कानडे, पुष्पा भालेराव, माजी सरपंच गंगाधर कानडे, ग्रामपंचायत सदस्य दत्ता कानडे, प्रशांत गुरव, गेणभाऊ गारगोटे, महादू भालेराव, पखवाज वादक दत्ता गारगोटे, लक्ष्मी पवार, मंदाकिनी पवार, नितीन पवार, सुनंदा कहडणे,विजया भालेराव, संध्या कानडे, सुमन कहडणे, कल्पना गुरव, ज्ञानेश्वरी कहडणे यांच्यासह ग्रामस्थ सहभागी झाले होते.