महाळुंगे पडवळ, ता. २२ : महाळुंगे पडवळ (ता. आंबेगाव) येथे श्रावणी बैलपोळा उत्साहात साजरा करण्यात आला. शिंगांना रंग व फुगे बांधून बैलांच्या काढण्यात आलेल्या मिरवणुका लक्षवेधक ठरल्या. जवळपास १३० हून अधिक बैल मिरवणुकीत सहभागी झाले होते. येथे पुणे जिल्ह्यातील सर्वात मोठा श्रावणी बैलपोळा भरतो.
ग्रामदैवत मारुती मंदिरात अभिषेक, काठी मिरवणूक, बबन सैद, दिनकर दातखिळे, मधुकर घोडेकर, नवनाथ आवटे व सदाशिव चासकर यांचा कलगीतुऱ्याचा कार्यक्रम झाला. यावेळी हुतात्मा बाबू गेनू सैद व माजी आमदार स्वर्गीय अण्णासाहेब आवटे यांच्या पुतळ्याला पाहुण्यांच्या हस्ते पुष्पहार अर्पण करण्यात आला. यावर्षी उपसरपंच अनिल पडवळ यांच्या बैलाला प्रथम पूजेचा मान मिळाला. ग्रामदैवत दत्त मंदिरावरील नदींस पोलिस पाटील सविता पडवळ व सरपंच सुजाता चासकर यांच्या हस्ते बाशिंग बांधून पूजन करण्यात आले. या प्रसंगी ग्रामस्थांच्या उपस्थितीत भंडाऱ्याची उधळण करीत बैलांच्या मिरवणुकीला प्रारंभ करण्यात आला.
बैलपोळ्यानिमित्त बैलांची विधिवत पूजा करून त्यांना पुरणपोळीचा घास भरविण्यात आला. यावेळी यात्रा समितीचे सचिव सुभाष पडवळ, एकनाथ आंबटकर, माणिक सैद, प्रदीप डोके, याकुबभाई इनामदार, शरद बँकेचे संचालक के. के. सैद, भीमाशंकर कारखान्याचे संचालक अरुण चासकर, सचिन चासकर, गणेश आवटे, डॉ. विठ्ठल चासकर, प्रशांत सैद, दीपक चासकर, विकास पडवळ, कुंडलिक घोडेकर यांच्यासह सर्व ग्रामपंचायत सदस्य उपस्थित होते.

शनिवारी रंगणार कुस्त्यांचा आखाडा
शनिवारी (ता. २३) दुपारी तीन वाजता कुस्त्यांचा आखाडा आहे. पारनेर, श्रीगोंदा, पुणे, सांगली, सातारा, कोल्हापूर, करमाळा, मावळ आदी भागातील पहिलवान येथे मुक्कामी आले आहेत. आखाड्याची तयारी पूर्ण झाली आहे, अशी माहिती यात्रा कमिटीने दिली आहे..