हिर्डोशी, ता. ७ ः हिर्डोशी (ता. भोर) येथील रघुनाथ दगडू वाशिवले व रामचंद्र दगडू वाशिवले हे सख्खे भाऊ आषाढी एकादशीनिमित्त पंढरपूरवरून दर्शन घेऊन परतत असताना त्यांना रानडुक्कराने धडक दिल्याने दोघेही जखमी झाले असल्याची घटना भोर- महाड मार्गावरील वेनवडी हद्दीतील मांगीर ओढ्याजवळ रविवारी (ता. ६) मध्यरात्री दोन वाजता घडली. सुदैवाने पाठीमागून आलेल्या वाहनाच्या उजेडामुळे रानडुक्कर पळून गेल्याने मोठा अनर्थ टळला.
वाशिवले बंधू हे रविवारी (ता. ६) सकाळी हिर्डोशीहून दर्शनासाठी पंढरपूर गेले होते. दर्शन घेऊन रात्री घराकडे परतत असताना वेनवडी हद्दीत रस्त्यावर डुकराची आठ- दहा पिल्ले दिसली म्हणून त्यांनी दुचाकी थांबवली. तेवढ्यात अचानकच पळत आलेल्या एका मोठ्या डुक्कराने उभ्या केलेल्या दुचाकीला जोरात धडक दिली. यामुळे बेसावध असलेले वाशिवले बंधू दुचाकीसह रस्त्यावर पडले. रात्रीचा अंधार असल्याने त्यांना पळताही येत नव्हते. खाली पडल्यावरही रानडुक्कराने त्यांच्यावर धावून जात दोघांनाही धडका दिल्या. परंतु सुदैवाने पाठीमागून आलेल्या वाहनाच्या उजेडामुळे रानडुक्कर रानात पळून गेले.
दोघा भावांच्या हाता पायांना जखमा झाल्या आहेत. तसेच रानडुक्कराचे दात लागले असून, दुचाकीचेही नुकसान झाले असल्याचे वाशिवले बंधू यांनी सांगितले. पंढरपूरहून पाठीमागून येणाऱ्या नातेवाइकांनी दोघांनाही निगुडघर येथील खासगी रुग्णालयात नेऊन प्राथमिक उपचार केले. जखमींना वनविभाकडून मदत मिळावी, अशी मागणी त्यांच्या नातेवाईक व ग्रामस्थांनी केली आहे.