महुडे, ता. २८ : कुंबळे (ता. भोर) येथील ग्रामपंचायत अधिकारी अभिषेक बोत्रे यांना भोर पंचायत समितीचे गटविकास अधिकारी किरणकुमार धनवाडे यांनी सोमवारी (ता.२८) जिल्हा परिषद सेवेतून निलंबित करण्याचा आदेश दिला.
ग्रामपंचायत कार्यालय कुंबळे येथे सोमवारी (ता.२८) मद्यपान करून महिला सरपंच व ग्रामस्थांशी असभ्य वर्तन केल्याबाबतचा अहवाल प्राप्त झाल्यानंतर ही कारवाई करण्यात आली आहे. ग्रामपंचायत अधिकारी बोत्रे यांना निलंबन काळात अन्य कोठेही नोकरी अगर व्यवसाय करता येणार नाही, तसे केल्याचे निदर्शनास आल्यास ते त्यांचे कृत्य गैरशिस्तीचे समजण्यात येईल व सदर आरोप त्यांच्यावर ठेवण्यात येईल. तसेच कोणत्याही अटीचा भंग केल्यास त्यांच्याविरुद्ध योग्य ती कारवाई करण्यात येईल व त्यांना देण्यात येणारा निर्वाहभत्ता मिळण्यास ते पात्र राहणार नाहीत, असेही आदेश गटविकास धनवाडे यांनी दिला आहे.