खेड शिवापूर, ता. ७ : श्रीरामनगर (ता. हवेली) येथील श्री योगीराज जनार्दन बिगर ग्रामीण पतसंस्थेची ३३वी वार्षिक सर्वसाधारण सभा नुकतीच खेळीमेळीच्या वातावरणात पार पडली. यावेळी संस्थेचे अध्यक्ष, राष्ट्रवादी खडकवासला विधानसभा अध्यक्ष राजेंद्र पवार यांनी संस्थेला तब्बल ८ लाख ७१ हजार १०० रुपयांचा नफा झाल्याची माहिती देऊन सभासदांना १२ टक्के लांभाश देण्याचे जाहीर केले.
संस्थेच्या या सर्वसाधारण सभेत संस्थेच्या वतीने सामाजिक भान ठेवत महाराष्ट्रात पुरामुळे शेतकरी वर्ग आर्थिक अडचणीत आला असून, या पूरग्रस्तांना मदतीसाठी मुख्यमंत्री सहाय्यता निधीला २५ हजार रुपये देण्याचा निर्णय सर्वानुमते घेण्यात आला.
सन २०२४ ते २०२५ या वर्षात संस्थेने उत्कृष्ट काम केले आहे. त्यामुळे संस्थेला मोठ्या प्रमाणात नफा झाल्याची माहिती सभेत देण्यात आली. तसेच, आगामी वर्षातदेखील संस्था नियमानुसार पारदर्शी काम करत सर्व सभासदांच्या विश्वासास पात्र ठरेल, अशी ग्वाही अध्यक्ष राजेंद्र पवार यांनी दिली.
यावेळी संस्थेचे सचिव सुनील मांगडे, संचालक विशाल पवार, राजेंद्र जगताप, तुकाराम पवार, तसेच ज्येष्ठ सभासद नामदेव मोरे, दत्तात्रेय बांदल, सुधीर पवार, संतोष वाव्हळ आदी उपस्थित होते.