निरगुडसर, ता. २२ : गणेशोत्सव अवघ्या पाच दिवसांवर येऊन ठेपल्याने गणेशमूर्ती बुकिंगसाठी गर्दी होऊ लागली आहे. त्यामध्ये यंदाच्या वर्षी ड्रेपरी धोतर, फेटा घातलेला गणपती, डायमंड वर्क केलेल्या गणपतींना मागणी अधिक आहे.
आंबेगाव तालुक्यातील खडकी फाटा येथील शिंदे कुटुंबीयांनी यंदाच्या वर्षी ६ हजार गणेशमूर्ती बनवल्या आहेत त्यामध्ये एक फुटापासून ते सहा फुटापर्यंत असलेल्या गणपतींचा समावेश आहे. अशामध्ये धोतर, फेटा घातलेला, पेशवाई पगडी, सदरा पूर्ण पोशाख परिधान केलेला गणपती तसेच डायमंड वर्क केलेल्या गणपतींना अधिक मागणी आहे. अशा प्रकारच्या साधारण दीड फुटाच्या गणपतीवर वर्क करण्यासाठी एक ते दीड तास लागतो तसेच ८०० ते १००० हजार रुपये अतिरिक्त सजावटीवर खर्च होत असल्याने गणपतीच्या किमतीत वाढ झाल्याचे गणेश मूर्ती सजावट करणाऱ्या अश्‍विनी शिंदे यांनी सांगितले.
खडकी येथील शिंदे कुटुंबीयांनी सहा हजार गणपतीच्या मूर्ती साकारल्या असून यामध्ये वर्क केलेल्या गणपतींचा समावेश आहे. संपूर्ण कुटुंब ह्या कामात व्यस्त असते यामध्ये सुनीता शिंदे, छाया शिंदे, मोहन शिंदे, प्रकाश शिंदे, मुलगा ऋषिकेश शिंदे, सून अश्‍विनी शिंदे, मुलगा ऋग्वेद शिंदे, यश भालेराव, वेदांत भालेराव या घरातील व्यक्तीं समवेत बाहेरील १० ते १२ कामगार या कारखान्यात काम करतात. वर्षभर गणपतीचे काम सुरू असते. शिंदे यांच्या गणपतीला पुण्यासह मोशी, चाकण तळेगाव, पिंपरी चिंचवड, अहिल्यानगर, कल्याण याठिकाणी मागणी असते.

कारखान्यात घडवितात सुमारे सह हजार मूर्ती
सुनीता, छाया शिंदे या दोन्ही जावांनी जिद्दीने २०१४ मध्ये गणपतीचा कारखाना उभारला. पहिल्या वर्षी साधारण ५०० गणपती बनवले त्यानंतर ७००, १००० गणपती बनवले जायचे. त्यानंतर गणपतीला मागणी वाढत गेली आता कारखान्यात दरवर्षी पाच ते सहा हजार मूर्ती घडविल्या जातात.