ओतूर, ता. १० : ओतूर (ता. जुन्नर) येथे त्रिशतकोत्तर वैकुंठगमन सप्ताह सांगता सोहळ्याचे आयोजन येत्या शनिवार (ता. १७) ते रविवार (ता. २५) यादरम्यान आयोजित करण्यात येत आहे. भारत- पाकिस्तान युद्धाच्या, तसेच मॉन्सून पूर्व वादळी वाऱ्यासह पावसाच्या पार्श्वभूमीवर जुन्नरचे उपविभागीय पोलिस अधिकारी रवींद्र चौधर यांनी शनिवारी बैठक घेऊन ग्रामस्थांना मार्गदर्शक सूचना केल्या.
यावेळी ओतूर पोलिस ठाण्याच्या पोलिस अधिकाऱ्यांसह ओतूर शहर व परिसरातील अनेक मान्यवर कार्यकर्ते, स्वयंसेवक व ग्रामस्थ उपस्थित होते. या कार्यक्रमासाठी भाविक आणि नागरिक मोठ्या संख्येने उपस्थित राहणार असल्याने कुठलाही अनुचित प्रकार घडणार नाही, त्यासंदर्भात काळजी घेणे ही सर्वांचीच जबाबदारी आहे. याबाबत मंडपाच्या सुरक्षेबरोबरच भाविकांसाठी कुलर, सुरक्षित स्टेज व्यवस्था, अग्निशामक दल, गर्दीमुळे चेंगराचेंगरी होणार नाही यासंदर्भातील दक्षता, पिण्याच्या पाण्याची सोय, अन्नप्रसादातून कोणाला त्रास होणार यासंदर्भात सुरक्षितता, लाइट सुरळीत आणि भरपूर उजेड असेल अशी व्यवस्था, वाहतुकीस कुठलीच अडचण निर्माण होणार नाही यासंदर्भात दक्षता, वाहने पार्किंगसाठी सुरक्षित ठिकाणे, वेळ पडल्यास काही रस्त्यांवर एकेरी वाहतूक, संत तुकाराम महाराज पादुकांच्या हेलिकॉप्टरसाठी कोणताही अडथळा नसलेले सुरक्षित हेलिपॅड, भाविकांच्या आरोग्याच्या दृष्टीने तत्काळ वैद्यकीय मदत, भाविकांच्या वस्तूंची चोरी होणार नाही यासंदर्भात खबरदारी, या व इतर विविध प्रश्नांवर यावेळी जुन्नरचे पोलिस उपविभागीय अधिकारी चौधर यांनी मार्गदर्शन केले. तसेच, पोलिस खात्याकडून संपूर्ण सहकार्य देण्याचे आश्वासन दिले.