ओतूर, ता. ९ : खरीप हंगाम सुरू झाला असून, अवकाळी पावसाने अडचणीत आलेला शेतकरी खरीप पेरणीच्या तयारीला लागला आहे. मॉन्सूनपूर्व पावसाने राज्यात धुमाकूळ घातल्याने अनेक ठिकाणी शेतकऱ्यांचे नुकसान झाले आहे. या सर्वांवर मात करत शेतकऱ्याने पुन्हा उभारी धरली आहे. परंतु खरिपासाठी लागणारे बी- बियाणे, खते आणि औषधांसाठी शेतकऱ्यांची अडवणूक आणि फसवणूक करू नये, असे आवाहन महाराष्ट्र राज्य कांदा उत्पादक शेतकरी संघटनेचे पुणे जिल्हाध्यक्ष प्रमोद पानसरे व इतर शेतकरी संघटनेच्या नेत्यांनी केले आहे.
संबंधित कृषी विभागाने बारकाईने लक्ष देणे गरजेचे आहे. दरवर्षी खरीप हंगामात बियाणे आणि खतांचा तुटवडा भासवून शेतकऱ्यांची आर्थिक लूटमारर करण्याच्या घटना मोठ्या प्रमाणात घडत आहेत. अनेक वेळा शेतकऱ्यांना बाजारातील नामांकित कंपन्यांऐवजी इतर चालू कंपन्यांचे बि- बियाणे व खते माथी मारत वापरण्यास प्रवृत्त केले जाते. अधिकृत बियाणांची अनेक वेळा व्यवस्थित उगवण होत नाही. त्यामुळे उत्पादनात घट होऊन शेतकऱ्यांचे नुकसान होत आहे. अशा वेळी दुकानदारांकडून हवामान, जमीन किंवा पावसाचे फालतू कारण सांगून शेतकऱ्यांची बोळवण करण्यात येते.
दुकानदार पावसाचा, हवामानाचा आणि शेतकऱ्यांकडून मागणीचा अंदाज घेत नामांकित कंपन्यांच्या बि- बियाणांचा तसेच खतांचा कृत्रिम तुटवडा भासवून चढ्या दराने विक्री करत असल्याच्या घटना घडत आहेत. यासंदर्भात कृषी विभागाने भरारी पथके नेमून, दुकानातील उपलब्ध साठा, भावफलक, शेतकऱ्यांच्या तक्रारी या बाबतीत तत्काळ दखल घेऊन योग्य ती कारवाई करणे अपेक्षित आहे.

ओतूर ते माळशेज पट्ट्यात पिंपळगाव जोगा व चिल्हेवाडी धरणामुळे मोठ्या प्रमाणात बागायती क्षेत्र आहे. भाजीपाला ,फुले, फळपिके, तरकारीचे मोठ्या प्रमाणात उत्पादन घेतले जात आहे. परंतु दर शनिवारी या भागातील खत-औषधांची सर्व दुकाने बंद ठेवण्यात येत असल्याने शेतकऱ्यांची गैरसोय निर्माण होत आहे. तसेच खरीप हंगाम सुरू असल्याने शेतकऱ्यांना अडचण येत आहे.या संदर्भात दुकानदारांनी आणि कृषी विभागाने दखल घेऊन शेतकऱ्याना दिलासा द्यावा.
-जालिंदर उकिर्डे, प्रगतीतील शेतकरी