ओतूर, ता. २० : येथून जवळच असलेल्या धुरनळी धबधब्यावर वर्षा विहारासाठी आलेल्या तरुण पर्यटकाचा पाण्यात बुडून मृत्यू झाल्याची माहिती सहाय्यक पोलिस निरीक्षक एल.जी. थाटे यांनी दिली. ही घटना रविवारी दुपारी तीन वाजेदरम्यान धबधब्याजवळील तलावात हा पर्यटक पडल्याने घडली.
जहीर अल्ली सराज अन्सारी (वय २१, नारायणगाव, ता. जुन्नर, मूळगाव पडरौना, ता. सिंगापट्टी, जि. कुसीनगर, राज्य उत्तरप्रदेश) असे मृत्यू झालेल्या तरुणाचे नाव आहे. याबाबत ओतूर पोलिसात मकबुल मनोहर मनसरी यांनी माहिती दिली. पोलिसांनी सांगितल्यानुसार नारायणगाव येथून मकबूल मनसरी, जहीर अल्ली व इतर दोघे दुचाकीवर धुरनळी धबधब्यावर गेले आणि तेथे धबधब्याखाली भिजताना वर्षाविहाराचा आनंद घेतला. त्यानंतर जहीर अल्ली हा लघुशंकेसाठी गेला आणि तेथील पाण्यात पडून बुडाला. त्यानंतर स्थानिक नागरिकांच्या मदतीने त्याचा पाण्यात शोध घेऊन त्यास बाहेर काढून ओतूर येथील खासगी रुग्णालयात उपचारासाठी दाखल केले, मात्र उपचारापूर्वीच त्याचा मृत्यू झाल्याचे डॉक्टरांनी सांगितले.