ओतूर, ता.८ : वडगाव आनंद (ता.जुन्नर) येथील कैलास वामन कोलते यांनी सेंद्रिय खते औषधे तसेच सीताफळाच्या बागेचे योग्य व्यवस्थापन करून भरघोस उत्पादन घेतले आहे. सध्या एक नंबर सीताफळाच्या एका डझनाला वाशी येथील बाजारापेठेत सहाशे रुपयापर्यंत बाजारभाव मिळत आहे. तर छोट्या फळांच्या एक डझनच्या ही जोठ्याला चांगला दोनशे ते अडीचशे रुपये दर मिळत आहे.
दोन वर्षांपूर्वी कोलते यांनी रघुनाथ लेंडे यांचा सहा वर्षांचा दीड एकर बाळानगर जातीचा सीताफळाची ६०० झाडे असलेला बाग खंडाने (मकत्याने) घेतला होता. त्यावेळी फळांची गुणवत्ता व आकार ही सर्वसाधारण होता. मात्र, यंदा कोलते यांना सतीष कुटे यांनी योग्य मार्गदर्शन केले. सीताफळावर पडणारे मिलिबग, बुरशी काळे डांग या रोगांपासून बचाव झाला तसेच फळांची आकारही मोठा मिळाल्यामुळे त्यांना यावर्षी सीताफळाच्या बागेत अधिक उत्पादन मिळाले आहे.
वामन कोलते यांनी सांगितले, की यंदा योग्य व्यवस्थापनामुळे एका झाडाला दीड ते दोन किलोपर्यंत फळे निघत आहे. मागील वर्षीच्या तुलनेने या वर्षी फळाच्या आकारात व गुणवत्तेत ही वाढ झाली आहे. याबाबत कैलास कोलते म्हणाले, की सीताफळ बागेला खालून पाट पाणी देत असून सतीष कुटे यांनी सीताफळ बागेचे व्यवस्थापन करण्यासाठी मार्गदर्शन करताना सेंद्रिय औषधे, द्रवरूप खते वापरण्याचा सल्ला दिला. उच्च दर्जाचे द्रव्यरूप खाते फवारणीमध्ये व जमिनीत टाकल्याने, यांचा चांगला फायदा झाला त्यामुळे फळांचा आकार ही मोठा झाला.

सेंद्रिय खतांमुळे फळांचा भक्कमपणा व गोडपणा वाढला आहे. दर्जेदार रंग आणि रोग मुक्त फळे मिळाली. साधारण एका सीताफळाचे वजन ४०० ग्रामच्या आसपास होत असल्याने बाजारभाव ही चांगला मिळत आहे. फळांचे अजून दोन मोठे तोडे होणार आहे. मागील वर्षी पेक्षा या वर्षी खर्च वजा जाऊन दुप्पट नफा मिळेल.
- वामन कोलते, सीताफळ उत्पादक

00554