पाबळ, ता. ८ : कान्हूर मेसाई (ता. शिरूर) येथील किराणा दुकानात खरेदीच्या बहाण्याने आलेल्या दोन युवकांनी महिलेच्या गळ्यातील सोन्याची पोत हिसकावून पोबारा केल्याची घटना घडली होती. या प्रकरणाचा तपास करत शिक्रापूर पोलिसांनी दोघांना अटक केली असून, त्यांनी गुन्ह्याची कबुली दिली आहे.
येथील विमल तानाजी साकोरे यांच्या किराणा दुकानात ही घटना घडली होती. दोन युवक दुकानात आले. त्यापैकी एकाने सिगारेट घेण्याचे कारण सांगितले, तर दुसऱ्याने दुचाकीवर थांबून लक्ष ठेवले. सिगारेट घेत असताना त्याने महिलेचा हात तोंडावर दाबत गळ्यातील सुमारे दोन तोळे वजनाची सोन्याची पोत हिसकावली आणि दोघे दुचाकीवरून पाबळ बाजूकडे पसार झाले. महिलेने आरडाओरडा केल्याने काही नागरिकांनी त्यांचा पाठलाग केला. मात्र, चोरटे पसार झाले. याबाबत विमल साकोरे (वय ६५) यांनी शिक्रापूर पोलिस ठाण्यात फिर्याद दिली. या प्रकरणाचा तपास करत असताना गुन्हे शोध पथकाला सणसवाडी परिसरात संशयित युवक व वर्णनाशी मिळती-जुळती दुचाकी आढळल्याची माहिती मिळाली. पोलिसांनी तत्काळ कारवाई करत संकेत संतोष विश्वासे (वय २१) व विकी रमेश घोरबांड (वय १९, दोघेही रा. सणसवाडी, ता. शिरूर, मूळ रा. उस्मानानगर ता. कंधार जि. नांदेड) यांना ताब्यात घेत अटक केली. या वेळी चौकशीत त्यांनी गुन्ह्याची कबुली दिली. याबाबत पुढील तपास पोलिस हवालदार संतोष शेळके करत आहेत.