पाबळ, ता. १६ : कान्हूर मेसाई (ता. शिरूर) येथे किराणा दुकानात बसण्यावरून झालेल्या किरकोळ कारणावरून दुकान चालकाला शुक्रवारी (ता. १४) मारहाण केल्याची घटना घडली आहे. याप्रकरणी शिक्रापूर पोलिस ठाण्यात चौघांविरुद्ध गुन्हा दाखल केला आहे.
पोलिसांनी दिलेल्या माहितीनुसार, कान्हूर मेसाई येथे सुभानराव ननवरे यांचे किराणा दुकान आहे. ते त्यांचा नातू आदित्य ननवरे चालवतो. त्यांच्या दुकानात शेजारील संग्राम ननवरे हा वारंवार येऊन बसत असल्याने आदित्यचे वडील कैलास ननवरे यांनी संग्राम याला दुकानात बसत जाऊ नये, अशी सूचना दिली. त्यानंतर हा मुद्दा संग्रामने घरी आई- वडिलांना सांगितला. त्यांच्या घरातील व्यक्तींनी रागात येऊन कैलास ननवरे यांच्याशी वाद घालत आमच्या मुलाला दुकानात का बसू देत नाही, असे म्हणत शिवीगाळ, दमदाटी आणि मारहाण केली. यावेळी कैलास यांचे आई-वडील मधे आले असता त्यांनाही मारहाण केली, असे फिर्यादीत नमूद आहे.
याप्रकरणी सुभानराव वामन ननवरे (वय ७६ रा. कान्हूर मेसाई) यांनी शिक्रापूर पोलिस ठाण्यात फिर्याद दिली. पोलिसांनी भाऊसाहेब दगडू ननवरे, संग्राम भाऊसाहेब ननवरे, रुक्मिणी भाऊसाहेब ननवरे आणि योगिता संग्राम ननवरे (सर्व रा. कान्हूर मेसाई) यांच्याविरुद्ध गुन्हा दाखल केला आहे. पुढील तपास पोलिस हवालदार संतोष शेळके करीत आहेत.