पाबळ, ता. २ : येथील भैरवनाथ देवाच्या यात्रेनिमित्त भाविकांनी दर्शनासाठी गर्दी केली होती. चोरट्यांनी या गर्दीचा गैरफायदा घेत भरदिवसा दोन महिलांच्या गळ्यातील सोनसाखळ्या लांबवल्याची घटना शनिवारी (ता. ३१) घडली. याप्रकरणी शिक्रापूर पोलिस ठाण्यात चोरट्यांविरोधात गुन्हा दाखल केला आहे.
पाबळ येथील भैरवनाथ देवाची यात्रा असल्याने परिसरातील तसेच आजूबाजूच्या गावांतील नागरिक यात्रेसाठी दाखल झाले होते. यात्रेत मुखई (ता. शिरूर) येथील रेश्मा आगळे व पाबळ येथील कल्पना बगाटे या महिलांच्या गळ्यातील प्रत्येकी अर्धा तोळे वजनाची सोनसाखळी चोरट्यांनी लंपास केली. याप्रकरणी रेश्मा महादेव आगळे (वय ३८, रा. मुखई, ता. शिरूर) यांनी शिक्रापूर पोलिस ठाण्यात फिर्याद दिली. पोलिसांनी चोरट्यांविरोधात गुन्हा दाखल केला. पुढील तपास सहायक पोलिस उपनिरीक्षक धनंजय थेऊरकर करत आहेत.