फुलवडे, ता. १० : कुशिरे (ता. आंबेगाव) येथील भोईरवाडीमधील शेतकरी शंकर भोईर यांची कन्या निलम भोईर हिची मुंबई शहर पोलिस शिपाईपदी नेमणूक झाली आहे. निलमने आपले प्राथमिक शिक्षण येथील जिल्हा परिषद शाळेत पूर्ण केले. त्यानंतर माध्यमिक व उच्च माध्यमिक शिक्षण शासकीय माध्यमिक आश्रमशाळा गोहे याठिकाणी पूर्ण केले.
अथक प्रयत्नातून आणि जिद्दीने पोलिस दलात दाखल होऊन देशाची व समाजाची सेवा करण्याचे तिच्या आई- वडिलांचे स्वप्न साकार केल्याने संपूर्ण पंचक्रोशीत तिच्यावर कौतुकाचा वर्षाव होत आहे. निलमने खंडाळा येथील महिला पोलिस प्रशिक्षण केंद्रात नऊ महिन्याचे प्रशिक्षण पूर्ण केले. सोमवारी (ता. ९) येथील सत्र क्रमांक ३६चा दीक्षांत संचालन समारंभात सर्व महिला पोलिस प्रशिक्षणार्थींना शपथ देण्यात आली. यावेळी प्रमुख अतिथी म्हणून पिंपरी चिंचवडचे पोलिस आयुक्त विनय कुमार चौबे तर निलमचे आई सिंधू भोईर, वडील शंकर भोईर, रामचंद्र भोईर यांच्यासह कुटुंबातील सदस्य या समारंभास उपस्थित होते.
शंकर भोईर हे शेती व्यवसाय सांभाळत आदिवासी क्षेत्रात शाश्वत संस्थेच्या माध्यमातून आपल्या आदिवासी समाजाचे प्रश्न सोडविण्यासाठी प्रयत्न करत आहे. ‘‘निलमने सर्वांपुढे एक नवा आदर्श निर्माण केला असून तिच्या पावलावर पाऊल ठेवून गावातील अनेक मुली पोलिस होण्याचं स्वप्न पूर्ण करतील अशी आशा आहे,’’ असे शाश्वत संस्थेचे अध्यक्ष बुधाजी डामसे यांनी सांगितले.

पोलिस दलात नोकरी मिळाल्याने आई-वडील व आजीचे स्वप्न पूर्ण झाले. तसेच, समाजसेवा करण्यासाठी या माध्यमातून संधी मिळाल्याने मला भरपूर आनंद होत आहे.
- निलम भोईर, पोलिस शिपाई.