फुलवडे, ता. २९ : फुलवडे (ता. आंबेगाव) येथे अलीकडेच दुर्मिळ कातळ शिल्पे आढळून आली आहेत. या शिल्पांमध्ये गोलाकार रचना, मंकळा खेळाचा पट तसेच इतर विविध नक्षीकाम आढळल्याची माहिती जुन्नरी-आंबेगाव कट्ट्याचे सदस्य अरविंद मोहरे, सागर हगवणे व मुन्ना उंडे यांनी दिली.
फुलवडे गावचा परिसर पूर्वीपासूनच ऐतिहासिक वारस्यासाठी प्रसिद्ध आहे. गावातील औदुंबरेश्वराच्या दर्शनासाठी राज्यभरातून लोक येत असतात. मंदिर परिसरात वीरगळ स्मृती शिळा, चुन्याच्या घाण्याचे दगडदेखील पहावयास मिळतात. या परिसरात असणारे धबधबे अतिशय सुंदर असून रिवर्स वॉटर फॉलदेखील आहे. जुन्नर व आंबेगावला जोडणारी ‘जुंदर वाट’ याच गावातून जाते. कातळ शिल्पांच्या शोधामुळे या भागाच्या इतिहासाचा अभ्यास करण्यासाठी नवे दालन उघडले आहे. पूर्वीच्या काळी मंदिरे, लेणी, किल्ले परिसरात मंकळा खेळाचे अवशेष आढळतात. यात खडकावर छोटे खड्डे करतात. मनोरंजनासाठी तसेच बुद्धीला चालना मिळण्यासाठी मंकळा खेळ खेळला जात असल्याचे जुन्नरी-आंबेगाव कट्ट्याचे संस्थापक ‘शिवनेर भूषण’ विनायक खोत यांनी सांगितले.