पौड, ता. ३० : भोर विधानसभा मतदारसंघातील पर्यटन विकास आराखडा तयार करून भोर विधानसभा मतदारसंघातील तीनही तालुके पर्यटन क्षेत्र म्हणून घोषित करण्याबाबत बैठक घेण्याची मागणी भोर, मुळशी, राजगड विधानसभा मतदारसंघाचे आमदार शंकर मांडेकर यांनी उपमुख्यमंत्री अजित पवार, पर्यटन मंत्री शंभुराज देसाई यांच्याकडे निवेदनाद्वारे केली आहे.
भोर-मुळशी-राजगड (वेल्हे) विधानसभा मतदारसंघ हा निसर्गसंपन्न, ऐतिहासिक आणि सांस्कृतिक दृष्टिकोनातून समृद्ध परिसर आहे. येथे रायरेश्‍वर किल्ला, तोरणा किल्ला, राजगड किल्ला, रोहिडेश्‍वर किल्ला, वीर धरण, नीरा देवघर धरण, पानशेत धरण, मुळशी धरण, टेमघर धरण, गुंजवणी धरण, घाटमाथ्यावरील सुंदर निसर्गदृश्ये, सह्याद्री पर्वतरांगा, कोरीगड, घनगड, कैलासगड, तैलबैल, तिकोना किल्ला यांसारखे ऐतिहासिक किल्ले तसेच अंधारबन, ताम्हिणी घाट, यांसारखी निसर्गरम्य स्थळे आणि खारावडे येथील म्हसोबा देवस्थान, डावजे येथील निळकंठेश्‍वर, नसरापूर येथील बनेश्‍वर मंदिर, वेल्हे तालुक्यातील शिरकाई देवीचे मंदिर यांसारखी धार्मिक स्थळे तसेच लवासा हिल, सहारा लेक सिटी, मांडवखडक, पिरंगुटची इंजाई, अंधारबन, ताम्हिणी घाट, मिल्की रिंग धबधबा आणि विविध पारंपरिक सण व उत्सव यांच्या माध्यमातून पर्यटनाची संधी निर्माण होणार आहे.
उपमुख्यमंत्री अजित पवार, पर्यटनमंत्री शंभुराज देसाई, जिल्हाधिकारी जितेंद्र डुडी यांच्याकडे निवेदने देऊन भोर विधानसभा मतदारसंघ पर्यटन म्हणून घोषित करण्याबाबत आणि पर्यटन विकास आराखडा तयार करण्याच्या दृष्टीने बैठक घेण्याची मागणी आमदार मांडेकर यांनी केली आहे.